Алатай гьафтеда Сулейман-Стальский райондиз “Минмелиоводхоз РД” ФГБУ-дин руководитель Залкип Къурбанов ва Дагъустан Республикадин архитектурадин, эцигунрин ва ЖКХ-дин министр Ибрагьим Къазибегов мугьман хьана. Идан асул метлебни райондин агьалияр дигидай ва хъвадай целди таъминарунин месэладихъ галаз чкадал таниш хьун тир.

Сифте  райондин кьил Нариман Абдулмуталибован кабинетда  З.Къурбановахъ галаз гуьруьш кьиле фена. Ана “Минмелиоводхоз РД” ФГБУ-дин руководителдин заместителар тир Ба­гъиш­ Чаниева, Шамил Османова, РД-дин Халкьдин Собранидин депутат Гьамидулагь Мегьамедова, райондин депутатрин Собранидин председатель Штибег Мегьамедханова, райондин кьилин 1-заместитель Лацис Оружева, жавабдар маса къуллугъчийри иштиракна.

Н.Абдулмуталибова къейд авурвал, “Минмелиоводхоз РД” ФГБУ-дихъ галаз санал сих алакъада аваз кIвалахуналди, районда агьалияр дигидай целди таъминарунин рекьяй гьар йисуз еке кIва­лах тухузва. Алай йисузни, ва­цIара яд тIимил авайтIани, агьалийриз, хуьруьн майишатдин карханайриз дигидай цикай кьитвал хьанач, хуьруьн майишатда кардик кутур проектрини планда къалурнавайвал кIвалахна.

Сихдаказ кIвалахунай, гьар са рекьяй гузвай куьмекдай райондин кьили З.Къурбановаз чух­­са­гъул ла­гьана.

З.Къурбанова вичин рахунра къейд авурвал, “Минмелиоводхоз РД” ФГБУ-дин руководстводи дигидай целди таъминарунин пата­хъай гьар са касдин, гьар са хуьруьн поселенидин администрациядин вилик жавабдарвал гьиссзава. Гьавиляй Герейханован къаналдал мягькемарунин ва Кировский къаналдал цIийикIа туькIуьр хъувунин кIвалахар тухвана.

Гуьруьшдал “Минмелиоводхоз РД” ФГБУ-ди тухузвай кIвалахдиз РД-дин Халкьдин Собранидин депутат Гьамидулагь Мегьамедова, райондин хуьруьн майишатдин ва суьрсетдин управленидин начальник Мегьамедзагьид Бабаева, райондин Общественный палатадин председатель Алимет Мейлановани рази жедай къимет гана.

Гуьруьшдилай гуьгъуьниз райондин кьил Н.Абдулмуталибов, “Минмелиоводхоз РД” ФГБУ-дин руководитель З.Къурбанов, райадминистрациядин жавабдар къуллугъчияр, СКФО-дин гуьз­чивалдай департаментдин начальник С.Никитин, РД-дин архитектурадин, эцигунрин ва ЖКХ-дин министр И.Къа­зибегов, адан заместитель З.Залки­пов “ШЕР” ООО организациядин ве­киларни галаз майишатрин арайра авай Кировский къаналдал цIийи­­­кIа туькIуьр хъувунин кIвала­хар кьиле тухузвай чкадал фена.

Малум хьайивал, вичин яргъивал 7565,46 метр тир къанал Сардархуьруьн кьилихъай башламиш жезва ва Курхуьруьн патав кьван физва. Эцигунрин участокдик къанал тухузвай рехъ, яд зарбдиз авахь­дай, гьакIни селлер къвайила, яд ахъайдай майданарни акатзава. Санлай къачурла, къаналдин яргъивал 9750 метрдиз барабар жезва, адак “Групповой водопровод Сардаркент-Даркуш-Казмаляр” проектдай эцигнавай 2225 метрдин къанални акатзава. И къанал реконструкция авуна акьалтIа­райла, 2500 гектар чилер цик акатда. Къаналдин рехъни Алкьвадрин ва Курхуьруьн поселенийрин чIурухъан участокрай фенва.

Проектра къалурнавайвал, къанал 7565 метрдин яргъивал аваз реконструкция ийида, идакай 3329 метрда бетон твада, 4236 метрда яд ачух чиляй тухванвай къаналдай фида.

Санлай проектдин сметадин къимет  12,753 млн манат я. “Минмелиоводхоз РД” ФГБУ-ди пудратдин “ШЕР” организациядихъ галаз кутIуннавай икьрардин бинедаллаз объектдал кIвалахар 2018-йисуз акьалтIарда.

Пешекарри гьисабзавайвал, къа­нал реконструкция хъувуни икьван чIавалди кутунвай багъларни уьзуьмлухар хуьдай, КIварчагъ де­ре­дин кьуд хуьруьн чилерал инвестиционный чIехи проектар кардик ку­тадай, 2500 гектар чIурухъан чи­лер­ дигидай участокриз элкъуьрдай мумкинвал гуда. Идалайни гъейри, къанал цIийикIа туькIуьр хъу­вурла, Алкьвадрин, Курхуьруьн, Кьулан СтIалрин, гьакIни Табасаран райондин са шумуд хуьруьн агьалияр дигидай целди таъминариз жеда.

РД-дин архитектурадин, эцигунрин ва ЖКХ-дин министр И.Къа­зибегов ва “Минмелиоводхоз РД” ФГБУ-дин руководитель З.Къурбанов объектдал тухузвай кIвалах­рилай рази яз амукьна. Абуру къейд авурвал, объектдихъ район яша­йишдинни экономикадин рекьерай вилик тухунин карда еке метлеб ава, гьавиляй республикадин талукь къурулушри объект вахтунда ишлемишиз вахкун патал куьмек гуда.

Республикадин меркездай атанвай багьа мугьманар “Сардаркент-Даркуш-Казмаляр” водоводдал алай михьи ийидай тадаракриз килигна.

Эхирдай Н.Абдулмуталибова райондиз атунай, тухузвай кIвалах­дихъ галаз мукьувай таниш хьунай И.Къазибеговаз, С.Никитиназ, З.Къурбановаз ва амай мугьманриз чухсагъул лагьана.

Хазран Кьасумов