ЧIуру хабар цIайлапан хьиз агакьнай,
Ясда гьатнай санлай Совет уьлкве чи.
Амма руьгьдай аватначир са касни,
Авайвиляй хва Сталин кьиле чи.
Ван галукьай гьа бередлай гьар са кас,
Эвер гунин лазимвални авачиз,
Гьатнай рекье мерд гуьгьуьллувилелди,
РикIе маса гъейри фикир амачиз.
Ватандин таъсиб хуьн гьар са инсанди
Везифа яз гьисабнай лап рикIивай.
Эвезнавай итимарни папари…
Къаст рикIеваз цана, векье, никIевай…
Саки кьуд суз, чил бажгъан, цав яргъан яз,
Чи советрин аскерри къар акъудна.
Абуруз каш, я мекь ганач садани,
Далу пата четинвилер алудна.
Тахтайбуру чанар гана чун патал,
Эбеди яз а чуьллера женгерин.
ЧIулав цифер алудна чи цавалай,
Дарбадагъна а угърашар немсерин.
Къаст гьам язвай совет халкьдин виридан,
Гьам чIехидан, гьам гьвечIидан, дишидан.
Душман кукIвар авун вичин магъарда,
Кьил хкаждай ада мад, акI тахьайтIа.
Хтайбуру орден, медаль хураллаз
Хтуна мад ислягь уьмуьр гуьнгуьна.
Я садани дамахарни авунач,
Чеб тафават хьанай лугьуз женгина.
Чи хуьрерал, шегьеррал чан хкана,
Вирибуру, гъил-гъилеваз сад хьана.
Анжах сад тир къастар абурун рикIерин. —
Акун чпиз чун — гележег шад хьана.
Садни кьенвач, рекьин тийир полкуниз
Элкъвенва къе гьар сад, тахтай женгерай.
Чун, веледар, уяхни я, гьазурни
Гьар макъамда, Ватанди чаз эверай…
Шагьабудин Шабатов
