Росздравнадзорди коронавирус азар квани квачни ахтармишдай цIийи жуьредин ПЦР-тест арадал гъанва. Адан кьетIенвал квекай ибарат я лагьайтIа, и тестди са пробиркада коронавирус квани квачни ва “омикрон” штамм яни тушни са гъилди дуьздал акъуддай мумкинвал гузва. ЦIийи тестди ахтармишун кьиле тухудай вахт тIимиларзава. ИкI, “Генериум” акционеррин обществоди (АО) “Тенсген” ООО-дихъ ва “Москва шегьердин здравоохраненидин Департаментдин ДЦЛИ-дихъ” галаз саналди арадал гъанвай цIийи ПЦР (полимеразная цепная реакция) тестдин куьмекдалди анализ кьилиз акъудун патал са сятни зур вахт лазим къвезва…
Алимри суьгьбетзавайвал, тестди “омикрон” штамм N-генда кьиле физвай мутацийрин бинедаллаз дуьздал акъудзава. Гзаф кьадар мутацийриз килигна, къенин юкъуз и штамм виридалайни фад акатзавайди я. Адакди гьатта коронавирусдикди азарлу хьана ва азардиз акси рапар яна, беденда антителаяр авай ксарни начагъ жезва, амма, малум тирвал, ам регьятдаказ алатзава.
Идалай вилик Гамалеян центрадин регьбер Александр Гинцбурга “омикрон” коронавирусдин эхиримжи штамм тахьун мумкин тирди лагьанай. Адан гафаралди, вирус датIана дегиш жезва, амма гуьгъуьнлай арадал атун мумкин тир штаммар генетикадин жигьетдай гьихьтин важиблувал авайбур жедатIа, гьелелиг малум туш.
РикIел хкин: 2020-йисуз винидихъ тIвар кьунвай “Генериум” АО-ди — илимдинни производстводин фармкомпанияди — коронавирус квани квачни чирдай сад лагьай тест арадал гъанай. Адахъ биотехнологиядин гьихьтин жуьрединди хьайитIани препарат арадал гъидай (молекуладилай башламишна, промышленный выпускдал кьван) лазим вири мумкинвилер ава.
Чи мухбир
