“Айболит”
— Кьил тIазвайла, са гъвечIи турбада аваз кьел холодильникдин морозильникда къурда. Ахпа ам кьилин кукIвал эцигна, вилер акьална, цIудалай садал къведалди гьисабда. Са шумуд декьикьадилай кьилин тIал секин жеда.
— Зигьин хъсанарун ва кьил гижи тахьун патал, кьурурнавай жикIияр куьлуь авуна, зур литрдин банка ацIурда, винелай пудан кьве паюниз эрекь илична, гьар юкъуз юзуриз кьве гьафтедин вахтунда мичIи чкада хуьда. Ахпа ам куьзна, шекердин са кIусунал 20 стIал вегьена ишлемишда.
— Бедендик витаминар тIимил хьана, иммунитет агъуз аватна, инсанди вич зайифдаказ гьиссдайла, агъадихъ галай рецептдикай менфят къачуда: 1 кг клюквадал, 1 кг кIусарнавай ичерал 2 истиканда авай кIерецдин куьлуь авунвай хвехверал 2,5 кг песокдикайни са истиканда авай цикай гьазурнавай шире илична, 5 декьикьада ргада. Гьар экуьнахъ фу недалди вилик хуьрекдин са тIуруна авайди чими цихъ галаз хъвада. Са гьафтедилай куьне бедендин къуват артух, гуьгьуьл ачух хьанвайди гьиссда.
— РикIин азарар авай гзафбуруз картуфдикай хийир жедайди чидач. Картуфдин чкалрик гзаф кьадар калий ва чи бедендиз бес тежезвай жуьреба-жуьре хийирлу маса шейэрни гзаф ква. Гьелбетда, картуфар жува битмишарнавай химикатар квачирбур хьун лазим я.
А къаришма икI гьазурда: чуьхвена михьи авунвай 4-5 картуфдин чкалрал 0,5 л яд илична, 15 декьикьада ргада. Ахпа ам куьзна, къурна, фу недалди вилик са истикандин кьатIа авайди хъвада. Ихьтин къаришмади дамарра ивидин гьерекат агъузарда ва рикIин кIвалахни хъсанарда.
Гьазурайди — Надият Велиева
