— Шекердин азар авайбуру гьар экуьнахъ ичIи рикIелай са вацран вахтунда чранвай чичIек ишлемишайтIа, беденда шекердин кьадар къайдадик жеда.
— Бурандин цилер гзаф азаррин дарман я. Абуру ратарин кIвалах къайдадик кутазва, гьакIни а цилер предстательный железадин азардин вилик пад кьун патални ишлемишзава.
250 г цилер як регъведай машиндай авадарна, са тIимил виртни хуькуьрна, гьар экуьнахъ чайдин са тIуруна авайди шалфейдин чайдихъ галаз ишлемишун гзаф хийирлуни я, тIямлуни.
— Ивидин давление хкаж хьанвайла, йикъа кьве сеферда чайдин са тIуруна авай куьлуь авунвай шивитрин тум ишлемишун хийирлу я.
— ДуркIунар тIазвайла, йикъа пуд сеферда хуьрекдин са тIуруна авай клюква гьакьван виртIедихъ галаз ишлемишун меслят къалурзава.
— ХъапI къвезвайла, хуьрекдин 1-2 тIуруна авай ичерин сирке 150 мл циз яна хъун меслят къалурзава.
— ХинкI (икота) ядайла, душица хъчадин ягълудин 2 стIал шекердал вегьена ишлемишда.
— Катаракта авайла, са ичинин юкь михьи авуна, аниз вирт вегьена, кIаник патай тIекв акъудна, стакандал эцигна, пакамдалди тада. Экуьнахъ стакандиз авахьнавай миже йикъа кьве сеферда гьар са вилиз 2 стIал вегьеда.
— Тумавар хьанвайла, яд, алоэдин ва серкин мижеяр (вири сад хьтин паяр) сад садак какадарна, йикъа 3-4 сеферда 7 стIал нерин хилериз вегьеда. Ихьтин дарманди гьатта лап яргъал чIугур тумаварни сагъарда.
— Къадим заманадин грекри фу тIуьрдалай гуьгъуьниз мецен юкьвал кьел вегьена фитIиндай. Им гзаф хийирлу кар я. Ада беденда азарлу клеткаяр пайда хьунин вилик пад кьазва ва сагълам клеткаяр арадал гъизва.
— Кьилин къати тIалар авайла, 20 г прополис 100 г спиртда ва я са стаканда авай эрекьда цIурурда. Кьилин тIал башламишнамазди фан кIусунал настойкадин 40 стIал вегьена неда. ТIал фад секин жеда.
— Гъилерик, кIвачерик цIарнах (грибок) квайла, са гъвечIи кIус памбагдал новокаиндин са шумуд стIал вегьена, цIарнах квай чкайривай гуьцIда. Хъсан нетижа гун патал новокаиндилай гуьгъуьниз анривай ксудалди вилик алоэдин мижени гуьцIун хийирлу я. Гьа икI 3-4 няниз ихьтин процедура авурла цIарнах михьиз сагъ жеда.
— Псориаз азар квайбуруз агъадихъ галай дарманди куьмек гуда. Ам икI гьазурда: 2 кака хана, аниз хуьрекдин са тIуруна авай семечкадин гъери вегьена, хъсандиз каф акъатдалди хуькуьрда. Ахпа а къаришмадиз хуьрекдин 2 тIуруна авай уксусдин кислота алава хъийида. Нетижада дуьдгъвердиз ухшар авай мазь арадал къведа. Ам кьил алай шуьшедин банкада хуьда. Ахпа йикъа са сеферда ам лекеяр квай чкайривай гуьцIда. Азардин сифте лишанар малум хьайила, и дарманди хъсан куьмек гуда, куьгьне хьанвай азардиз мазь яргъалди ишлемишна кIан жеда.
— КIвачер дакIунвайла, кушдин (лён) тум ругур гьалима хъун хийирлу я. Ам икI гьазурда: чайдин кьуд тIуруна авай кушдин тумунал са литр яд илична, 10-15 декьикъада ругуна, катул чими чкада эцигна, са сятда тада. Гьалима куьз тавуртIани жеда. Дад хъсан хьун патал аниз лимондин ва я маса майвадин миже яда. Гьалима гьар кьве сятдилай йикъа 6-8 сеферда куз-куз стакандин кьатIа авайди хъвада. 2-3 гьафтедилай куьне нетижа гьиссда.
«Айболит» газетдай гьазурайди — Надият Велиева
