Свах тIадайла, памбагдин гъвечIи кIус, валерианадин настойкадай кьежирна, сухвал эцигайтIа, са 10 декьикьадилай тIал атIуда.
Серг гзаф азаррин дарман я. Месела, жигеррик ракдин азар квайла, ам икI ишлемишда: 0,5 л банкадин са кьатIа авай регъвенвай серкинал банка ацIудалди вирт илична, кьве гьафтеда мичIи ва къайи чкада эцигда. Ахпа ам куьзна, холодильникда хуьда. Йикъа 3-4 сеферда фу недалди вилик хуьрекдин са тIуруна авайди банка ичIи жедалди ишлемишда.
Азаррин вилик пад кьун патал йикъа 2-3 силих регъвенвай серг ишлемишун гзаф хийирлу я.
Хуквада авай хер хъсан хьун патал, йикъа пуд сеферда паркьулдин тазаз гьазурнавай миже хъун меслятзава. ГьакIни хуьрекдин са тIуруна авай, кьурурна куьлуь авунвай паркьулдин дувулрал 100 мл медицинадин спирт илична, адак 100 г вирт хуькуьрна, 7 юкъуз тада. Ахпа чайдин са тIуруна авай къаришма йикъа пуд сеферда гьал хъсан жедалди ишлемишда.
Кьил элкъвезвайла, шалфейдин чайдин са тIуруна авай хъчарал са истикан ргазвай яд илична, ам рекъидалди тада. Ахпа ам куьзна, са йикъан вахтунда хъвада.
Туьтер тIазвайла, хуьрекдин 2 тIуруна авай мерейрин пешерал са истикан ргазвай яд илична, йикъа 3-4 сеферда туьтера экъуьрда.
Уьгьуьяр акатнавайла, хуьрекдин 2 тIуруна авай регъвенвай ичиник гьакьван вирт ва хуьрекдин са тIуруна авай регъвенвай чичIек акадарна, хъсандиз хуькуьрна, ахпа йикъа 4-7 сеферда, уьгьуьяр хкатдалди ишлемишда.
Япарал залан хьанвайла, паркьулдин миже икьи жедалди ргада, ахпа ам йикъа са шумуд сеферда ван къведай арадивай гуьцIда. Миже холодильникда хуьда.
Жалгъаяр тIазвайла, валерианадин компрессди куьмек гуда. Мадни, эгер ахвар секинсузди яз хьайитIа, ксудайла, кьилихъ валерианадин ва пурнийрин дувулар авай турба эциг.
РикI кузвайла, чайдин са тIуруна авай куьлуьз куьткуьннавай бияндин (солодка) дувулрал са истикан ргазвай яд илична, 15 декьикьада тада. Ахпа ам куьзна, йикъа 1-2 истиканда авайди хъвада.
Кьуру уьгьуь квайла, са истиканда авай рганвай некIедик хуьрекдин са тIуруна авай кьурурнавай шалфей кутуна, хъсандиз кIевирна, зур сятда тада. Ахпа ксудалди вилик куз-куз хъвада.
Дамарра ивидин гьерекат агъуз аватнавайла, чичIекрин хъуьруьшар ругунвай гьалима гзаф хийирлу я. Ам икI гьазурда: са 2-3 чичIекдилай алуднавай хъуьруьшрал са литр яд илична, 100 гр шекердин песок алава хъувуна, 15 декьикьада зайиф цIал ргада. Ахпа йикъа са шумуд сеферда са истикандин кьатIа авайди ишлемишда. Ихьтин гьалима гатфариз ва зулуз иллаки хийирлу я.
ДуркIунар ва чIулав лекь сагъарун патал жикIийрин чайдикай менфят къачуда: 2-3 истиканда авай жикIийрал 2-3 литр яд илична, 10 декьикьада ругуна, кьве сятда тада. Ахпа адаз шекер алава хъувуна, экуьнахъ, нянихъ са истиканда авайди хъвада. Ихьтин чай ишлемишай 3-4 вацралай чIулав лекь михьи, зигьин хъсан жеда, дуркIунри хъсандиз кIвалахда.
«Айболит» газетдай.
Гьазурайди — Надият Велиева
