Афгъанистанда интернациональный буржи тамамариз, чи гзаф жегьилар фена. Адилов Гьамзат Смаиловични абурукай сад я. Ам 1968-йисан 26-апрелдиз Мегьарамдхуьруьн райондин Гъепцегьрин хуьре дидедиз хьана. 8-класс куьтягьай жаван Белиждин 8-СПТУ-диз гьахьна, водитель — автослесарвилин пеше къачуна.
Армиядин жергейриз эвер гайила, Ашхабадда ругуд вацра сержантар гьазурдай курсара кIелна. 1987-йисан ноябрдиз Кандагардиз мотострелковый бригададиз акъатна.
— Чна дагълух хуьрериз, къумлухриз, гьакIни къацу зонадиз рейдар тешкилзавай, — суьгьбетзава Гь.Адилова. — Дяведин ва недай суьрсет, ГСМ гвай дестеяр, генералар, чIехи командирар рекье твазвай. Саки — гьар юкъуз. Им, гьелбетда, хаталувал авай кар тир: душманри далдаламиш хьанвай чкайрай чал датIана цIай къурзавай. Гьелбетда, телеф, хирер хьайибурни жезвай, иллаки — “чIулав майдан” лугьудай чкадай фидайла. Ам Кандагардин патав гвай, ана тамар, чуьнуьх жедай гзаф чкаяр авайвиляй сакIани пуьрчуькьариз жезвачир. Чун пуд суткада Пакистандихъ галаз авай сергьятдал дагълара чуьнуьх хьана. Са йифиз сятдин кьуд жедайла хьиз, чаз акуна хьи, Пакистандай Афгъанистандиз яракьар гъизвай карван къвезва. Вад сятда къизгъин женг кьиле фена. Эхирни куьмекдиз чи вертолётар агакьна, а карвандикай затIни амукьначир. Ана чи взводдин командир кьакIави Нияз Велиев тир. Телефвилер, хирер хьайибур чи патайни авачиз тушир.
Чкадинбуруз гьар са дагъ, дере, къван, улам хъсандиз чизвай. Абурув Англияди, Италияди, США-ди ва маса уьлквейрини агакьарзавай яракьар гвай, гьавиляй чи аскеррикай телефвилерни жезвай. Гьамзата давамарзавайвал, са сеферда 1987-йисуз 40-армиядин штабдин начальник генерал Варенниковни галаз рекье авайла, колоннадиз гуьлле гуз башламишна. Чи аскеррин дирибаш гьерекатрин нетижада вири саламатдиз амукьна. Гь.Адиловаз лагьайтIа, “За отвагу” медаль гана.
1988-йисуз буржи кьилиз акъудна хтай жегьил Махачкъалада эцигунардай материалрин комбинатда, 1994-йисуз налогрин полицияда кIвалахал акъвазна. 1997-йисалай ОМОН-да къуллугъзава. Гьуьрметлу хизанда кьуд велед тербияламишзава. Гь.Адилов Къарамахидин, Чабанмахидин, Ботлихдин вакъиайрин иштиракчини я. Сифте ягъунар омоновчийрал ацалтнай. Адаз гьакIни общественный къайдаяр хуьдайла, тафаватлу хьунай, юбилейрин, гьакI маса медалар, шабагьарни ганва.
Ш.Шихмурадов
