18-февралдиз Махачкъаладин аялрин библиотекада хайи чIаларин Международный йи­къан­ сергьятра аваз лезги чIалаз ва милли медениятдиз талу­кьар­навай мярекат тешкилнавай. Аниз меркездин 1, 37, 28 ва маса мектебрай аялриз, муаллимриз, лезги чIал ва меденият ахтармишзавай алимриз, аялрин писателриз теклифнавай. Мярекат телеэкрандилай лезги халкьдин тарихдиз талукь кинодин лентер ва документар къалурунилай гатIунна.

Мярекатда иштиракай аялри (муаллимар — Н.Теймурова, З.Шам­судинова, А.Насруллаева) лезги чIалай ва литературадай чпихъ хъсан чирвилер авайди раижна. Абуру хуралай шиирар кIелна, манияр лагьана, сегьнеяр къалурна. Меркездин 5-нумрадин музшколадин тербиячийрин дестеди милли алатрал (тардал, чуьнгуьрдал, далдамдал) хейлин авазар тамамарна.

Тар ягъунай вичихъ хъсан ала­кьунар авайди 28-нумрадин мектебдин 8-классдин ученик Къазанфар  Жалилова  къалурна (муаллим — Диляра Исмаилова). Къазанфар тардал ашукьарай сад лагьай муаллим Камил  Шерифалиев  я.

Мярекатдал лезги чIал чирза­вай аялрин ва муаллимрин ала­­кьунрикай чпин фикирар тIвар-ван авай алимар тир Къурбан Акимова ва Шайдабег Мирзоева лагьана. Абуру библиотекадиз хейлин ктабарни багъишна.

Библиотекадин къуллугъчийри  (библиограф — П.Ж.Салманова, директордин заместитель Р.Ж.Къурбанова) мярекатда иштиракайбуруз сагърай лагьана.

Чи мухбир