Республикада бандитрин дестеяр чукурайдалай инихъ 20 йис тамам хьунин юбилей гурлудаказ къейд ийидайвал я. Адаз гьазур хьунин кIвалахрив йисан сифтедилай эгечI­навай. Алатай гьафтеда РД-дин Кьил Владимир Васильеван регьбервилик кваз кьиле фейи ­совещанидал малумарайвал, ­республикадай бандитар чуку­рунин карда ва женгера иштира­кайбуруз гудай махсус медалар гьазур я.

РД-дин Гьукуматдин Председателдин 1-заместитель Анатолий Къарибова хабар гайивал, юбилейдин мярекатар 14-сентябрдиз Новолак ва 15-сентябрдиз Ботлих районда кьиле фида. Анра Дагъус­тандин халкьарин милли майданар кардик кутада. Кьилин мярекат­ Махачкъалада, А.Алиеван тIва­ру­нихъ галай спортдин ва жегьилрин дараматда тешкилда. Ана республикадин руководителри, гьукуматдин членри, ведомствойрин, районрин, шегьеррин администрацийрин, къайдаяр хуьдай, военный органрин руководителри, общественный, диндин, жегьилрин организацийрин, прессадин векилри иштиракда.

РД-дин культурадин министр Зарема Бутаевади лагьайвал, кIватI хьанвайбурун вилик Россиядин, Кеферпатан Кавказдин, Дагъустандин искусстводин, музыкадин устадар, эстрададин сегьнедин гъетер, халкьдин фольклордин коллективар экъечIда.

Дараматдилай гъейри Дагъустандин госфилармониядин гатун майдандал суварин чIехи концерт къалурда. 1999-йисан вакъиайрин иштиракчийриз юбилейдин мярекатрик теклифдай гьар садан тIва­рар кхьенвай махсус билетар гьазурнава.

Муниципалитетрин культурадин вири идарайра юбилейдиз талу­кьарнавай элкъвей столар, гуьруьшар, шикилрин выставкаяр теш­килда.

Каспийск шегьердин администрациядин кьил Мегьамед Абдуллаева малумарайвал, Дарамат ви­ри патарихъай гьазурнава. Зурба сегьне арадал гъанва, зал, сегьне нурламишдай техника, светодиоддин экранар эцигнава.

Юбилейдин тешкилатчийриз мярекатар кьиле тухуз 100 волонтердини куьмек гуда. Абуру саки вири районрай, шегьеррай къвезвай мугьманар кьабулда, абуруз ацукьдай чкаяр къалурда ва маса куьмекарни гуда.

Юбилей къейдзавай йикъара тамашачийриз къалурун патал Да­гъустандин телекомпанийри 1999-йисан вакъиайрикай, женгера иштиракай игитрикай, кьегьалрикай, ополченцийрикай фильмаяр гьазурзава.

Совещанидин эхирдай Вла­димир Васильева къейдна: “Къе чун лап важиблу месэладиз килигна. Чаз къад йис идалай вилик хьайи чIуру вакъиайрин иштиракчийрихъ галаз гуьруьш жедай мумкинвал ава. Абурукай бязибур сагъзамач. Чи везифа — абур ри­кIел хуьн ва гьа кьегьал, ви­кIегь инсанрин игитвилер кьа­тIунун я”.

Нариман Ибрагьимов