За “Коммунист” (“Лезги газет”) 1963-йисалай кхьизва. Жуван дидед чIал девлетлу ийизвай, хуьзвай адан мана-метлеб лап чIехиди я. Алай девирда кIвалахдай чкаяр  амачирла, жегьилар патарал финиз мажбур хьанва. Школайра лагьайтIа, кIелдай аялрин кьадарни тIи­мил жезва. Гьа са вахтунда патарилай хтай ая­лар дидед чIалал рахазвач ва я чIалар, гафар какадарзава. Хуьрера чIехи хьанвай агьалиярни патарал фена, хуьрериз хтайла, урус чIалал­ди рахазва. Урус чIал чир хьун, гьелбетда, пис кар туш. Амма жуван дидед чIал квадаруниз  рехъ гана кIандач.. Дидед чIал течирла, вун вуч кас ятIа лагь кван.

Чи ватанэгьлийри милли чIалаз фикир тагун, ам рикIелай алудун еке бахтсузвал я. Дидед­ чIал хуьн, ам девлетлу авун, “Лезги газет” кхьин  гьар са лезгидин пак буржидиз элкъвена  кIанда.

Чахъ дидед чIалалди рахай, милли медени­ят хвейи, халкьни, лезги чIални дуьньядиз маш­гь­урай Алкьвадар Гьасан эфенди, Муьшкуьрви Гьажи Давуд, Ярагъ Мегьамед, генерал Араблинский, Лезгинцевар, Куьре Мелик, Кьуьчхуьр Саид, Етим Эмин, СтIал Сулейман… ва икI мад кьегьал рухваяр хьана. Чун абур рахай чIал хуьз, ам гележегдин несилрални агакьариз алахъун лазим я.

Чир хьухь: и жигьетдай “Лезги газетди” еке роль къугъвазва. Ада чал дуьньяда, Россияда, Да­­г­ъустанда кьиле физвай вакъиайрикай хабарар агакьарзава, чаз дуьз рахаз чирзава, гьар са­на авай баркаллу лезгийрикай кхьизва. Газет гьар са лезгидин кIвале хьун дамах тушни бес! Ам кхьин патал медениятдин, образованидин, медицинадин рекье зегьмет чIугвазвай гьар са агьали кIвенкIве хьун герек я. Дидед чIалалди акъатзавай изданийрин мана-метлеб екеди тирди аннамишна кIанда. Абур чи руьгьдин ем я. За лагьайтIа, гьар йисуз, “Лезги газетдилай” гъейри, “Самур”,”Кард” журналарни кхьизва. Абур кIе­лу­ни зи зигьин артухарзава. Къиметар гуя  багьа­ я лугьуз, багьнаяр акъудиз, газет кхьин тавуна акъвазун дуьз туш. Дамахна кIанда жуван чIа­лал газет акъатунал. Ам алай йисан амай варцара кхьиз рикIелай алудмир, гьуьрметлу лезгияр.

Тиражар ви вине хьуй,

Виридалай кIвенкIве хьуй,

ГъвечIи-чIехи талгьана,

Гьар са касдин гъиле хьуй!

Вадим Жамалдинов