За и ихтилат кIвализ “Лезги газет” хквен тийизвай ксарихъ, хизанрихъ элкъвена ийизва. Алай девирда чи уьлкведа бажарагълу, дерин чирвилер авай духтурар тIимил хьанва. Азарлуйрин кьадар йисалай-суз артух жезва.

Гьалар къалабулух квайбур тирвиляй, дуьнья барут авай челегдал алайди хьиз авайвиляй инсанрин рикIериз архайинвал, секинвал амач. Сир туш, чIехи пай уьзуьрарни инсандин рикIиз секинвал тахьайла арадал къвезва. Хуьрера, шегьерра аптекаяр къарникъузар хьиз, гзаф жезватIани, анрай гузвай хейлин дарманар­ ери авайбур туш. Амма инсандивай чIехи пай­ дуьшуьшра вичивай вичиз куьмек, жуван рикIиз секинвал гуз жезвайди я. Гьавиляй ахьтин жигъи­рар жагъурна кIанда.

Ихьтин са меслят къалурин. Жуван нервияр се­кинарун патал лезги чIалалди акъатзавай багъри “Лезги газет” къачун, ам кхьин теклифзава.  Сиф­те чинилай эхирдалди ам кIела. Эгер куьне “Лезги газет” кхьизвачтIа, кIелзавачтIа, им лагьай­ гаф я хьи, квез дуьньяда, уьлкведа лезги халкьдин векилри гьихьтин лайихлу чка кьаз­ватIа чиз­­вач­. Дувул галачир тарни жедач, тарих­ авачир халкьни. “Лезги газетдин” чинрай квез дегь заманайрилай инихъ чи халкьдихъ гьихьтин бажарагълу алимар, шаирар, игитар  — лезги халкь патал зегь­мет чIугур инсанар хьана­тIа, аватIа аквада. Ла­йихлу инсанрикай чаз икьван гагьда тIимил чиз­вайтIа, “Лезги газетди” чи чирвилер артухарзава.

Гьа са вахтунда алай девирни жумарт инсанралди мискьи туш. ЦIийи тIварарикайни квез багъри газетдин чинрилай малуматар, хабарар жагъида.

Газет кIелдайла, куь фикирдиз, зун а кардих­ъ инанмиш я, уьзуьрдикай фикир, хиялни къведач. Эхь, хайи чIал ризкьидилайни, гьавадилайни багьа я. Квез чIални дарман тирди чизвач жеди. Жуван лезги чIалан, багъри газетдин дустар хьухь! Куьн адаз гьикьван мукьва хьайитIа, гьакьван хъсан ва сагъ жеда!..

ГьакI зун лезги я лугьуналди лезги жедач. Лезги чIал тийижир лезги хьун — им гьихьтин гьал я?! Халисан лезги хьун паталди хайи чIал хъсандиз чир хьана кIанда. “Лезги газет”, багъри чIа­лал ктаб-журнал кIелна кIанда. Лезги чилин руг чекмейрал алачирдаз халис лезги лугьуз жедани?! Эгер куьне “Лезги газет” кIелиз баш­ла­мишайтIа, лезгивилин руьгь ахварай аватда.

Куьн захъ инанмиш хьухь, и кар за жуван хамуналди ахтармишна.  Аптекадиз физ, дарманар къачуз, пул куьтягьдалди, лезги чIалал кхьенвай газетарни журналар къачун ви чандизни регьят я, руьгьни девлетлу жеда. Зи гъавурда дуьз акьурбуруз баркалла! Вири сагърай!

Тегъи Мегьамедов