Машгьур композитор, Дагъустандин ва Азербайжандин халкьдин артистка Эльза Ибрагьимовадикай, генани дуьз лагьайтIа, адан яратмишунрикай заз гьеле аял вахтарилай хабар авай. Азербайжандин игитриз бахшнавай эсеррихъ (опера ва реквием) за гзаф яб акалайди я.
Зун Бакуда авай. Заз зи ватанэгьли Вагифа зенгна ва “Чи Эльза кьена, къе ам кучукзава” лагьана хабар ва адан кIвалин адрес гана. Гьелбетда, зун гьасятда аниз фенай. РикIел алама, югъ лап мекьиди тир. Гьаятда кьурук гзаф инсанар кIватI хьанвай. Садбуру чай хъвазвай. Садбуру дуьа кIелзавай. Ахпа ам кучукиз инсанар машинра аваз сурарал фена. Хкведайла “Мегьрибан улар” маниди зун кIвализ кьван рекье хтуна.
Кьейидалай кьулухъ са тIимил вахтар алатайла, Эльза Ибрагьимовадиз “Мегьрибан Ана” (“Ласковая мать”) орден гана. И орден анжах чIехи крар алакьай машгьур дишегьлийриз гузвайди заз чизвай…
Э.Ибрагьимова амач, амма адан манийрихъ исятдани яб акалзава. ГьакI — чи машгьур рушан тIвар алаз, мумкин я, Каспий гьуьлелай Керчдиз физвай Азербайжандин гимидани.
Бикеханум Алибегова
