Ахцегь райондин Хуьруьгрин хуьре РД-дин лайихлу муаллим Магьмуд Абдулкеримован регьбервилик квай просвещенидин “Luminary” центр арадал гъунин кьилин мурад-метлеб ина илимдин, техникадин, искусстводин жуьреба — жуьре хилерай акьалтзавай несилдин бажарагъ, мумкинвилер ачухарун я. И жигьетдай кьетIен фикир ина аяларинни яратмишунин интеллигенциядин векилрин гуьруьшар тешкилуниз гузва. ИкI, 24-декабрдиз Хуьруьгрин хуьруьн юкьван школадин 5-9-классдин аялрихъ галаз танишарун ва милли музыкадин темадай ачух тарс тухун патал иниз РД-дин Гьукуматдин академический кьуьлерин лайихлу “Лезгинка” ансамбль оркестрдин ва гьакI музыкадин милли алатрин “Макъам” ансамблдин руководитель, тар ягъунай машгьур устад Шерифалиев Шамил Камиловичаз теклифнавай.
“Люминари” центрадин координатор Лариса Исмаиловади тешкилнавай мярекат, сифте гаф рахуналди, райондин культурадин управленидин начальникдин заместитель Сулейман Сулейманова ачухна ва микрофон мугьмандин ихтиярда туна. Аялрин тIалабуналди ада сифте вичикай, пешекар музыкантвилиз камар къачунин, устадвал хкажунин, яратмишунин рекьикай итижлу суьгьбетна.
— Бубадин теклифдалди сифте за тардай Ахцегьрин музшколада Мирзоев Низам муаллимдин гъилик, ахпа Махачкъаладин музучилищеда кIелна, гьа са вахтунда ДГУ-да психологиядинни философиядин факультет, гуьгъуьнайни Нальчикда Кеферпатан Кавказдин искусствойрин институт куьтягьна. Композитор Падишагь Киберован ва тар ягъунай бажарагълу устад Рамазан Бинетован гъилик чирвилер къачуна. Куьрелди, кIелунни, кIвалахни санал кьадайвал, зун 18 йисалай “Лезгинка” ансамблдин оркестрда ава. Ина ва иллаки жуван “Макъам” ансамблдин репертуарда кьилин фикир за милли музыка машгьуруниз гузва. Дуьньяда бажарагълу саки вири композиторрин машгьур эсерар халкьарин милли музыкадин бинедаллаз туькIуьрнава. Лезги халкьдин музыкадин фольклордикай рахайтIа, ам гьеле неинки тамамвилелди кIватI хъувуна кхьенвач, ерли ахтармишнавач лагьайтIа жеда. Месела, чи рагьметлу композитор Мегьамед Гьуьсейнова “Шарвили” опера, оркестрдихъ галаз тардин рапсодия чи милли музыкадин бинедаллаз теснифнава. Гьуьрметлу аялар, алай вахтунда уьмуьрда са гьихьтин ятIани дережадив агакьун патал гзаф зегьмет чIугуна, кIелна кIанда, — къейдна ада…
Ахпа Шамил Шерифалиева, залда авайбурун суалриз жавабар гуналди, лезгийрин милли алатрикай, кьилди къачуртIа, тардикай итижлу суьгьбетна. Ада тардал еке устадвилелди лезги ва Дагъустандин халкьарин милли авазар тамамарна, “Макъам” ансамблдин видеороликар къалуруналди, абуруз баянар гана. Саки кьве сятда давам хьайи милли музыкадин искусстводин ачух тарс адан иштиракчийрин рикIел яргъалди аламукьдайди ва лап менфятлуди хьана.
Дашдемир Шерифалиев
