Россиядин Яракьлу Къуватри Донбассдин чилер, шегьерарни хуьрер Украинадин миллетбазрикай хуьн патал кьиле тухузвай дяведин махсус серенжемдикай, ана душмандихъ галаз женгера чи аскерри къалурзавай тешпигь авачир викIегьвилерикай рахадайла, «ватанпересвал» гаф мукьвал-мукьвал ишлемишна кIан жезва. Вуч я ватанпересвал? И суалдиз жаваб Россиядин Президент Владимир Путина лагьай келимайрай жагъизва: «Чна чи гележег мягькем бинедал эцигна кIанда. Ихьтин бине ватанпересвал я».

Ватанпересвиликай, чи аскеррин кьегьалвилерикай ихтилат чи йикъа­рин игитар­ тир Таймуров Ильяс Тажидиновичахъ ва Булханов Саид Алдеровичахъ галаз кьиле фена.

За са кардиз фикир гана: игитар вири девирра, къилихрал, кьисмет­рал гьалтайла, сад-садаз ухшар жеда. Ильяс Тажидиновични Саид Алдерович къилихриз секин, ахлакь ва низам, ачух рикI, ширин мез авай инсанар я. Чпи СВО-да тамамарай везифайрикай рахун абуруз са акьван хуш туш, амма абуру чи аскеррин викIегьвилерал, ватанпересвилел дамахзава.

Ильяс Таймуров 1980-йисан 30-ок­тябр­диз Кьасумхуьрел дидедиз хьана. Ада 1997-йисуз Кьасумхуьруьн 1-нумрадин юкьван мектеб, гуьгъуьн­лай «юриспруденция» пешедай Да­гъус­тандин педуниверситет ва РФ-дин Президентдин патав гвай РАНХиГС акьалтIарна.

– 2014-йисуз Крым Россиядин­ ­Федерациядик экечI хъувуна, – их­тилат­зава Ильяс Тажидиновича. – Закай­ Крымда РД-дин гьукуматдин векил­ хьана. Кьве йисалай зун Крым Рес­пуб­ли­кадин кьилин советниквиле тайи­­нарна.

Жавабдар и везифаяр кьегьал лезги хци намуслудаказ кьилиз акъуд­на. Гуьгъуьнлай И. Таймурова Рос­сия­дин оборонадин министерстводин ДОСААФ-дин председателдин куьмекчи яз зегьмет чIу­гуна, ватанпересар тербияламишуник еке пай кутуна.

ГъвечIи чIавалай халис кьегьал яз вердиш хьайи И. Таймурова вич жуьрэтлу ватанперес яз къалурна. Сифтедай ада Чечняда кьиле фейи гьерекатра, 2025-йисан сифте кьилерилай старший сержантди СВО-да ишти­ракна.

– Захъ яшар бегьем тахьанвай 4 аял авайтIани, Донбассда кьиле тухузвай дяведин махсус серенжемдиз зун жуван хушуналди фена, – давамарзава ихтилат Ильяса. – Миллетбазрихъ галаз хьайи женгинин гьерекатра зал хирер хьана. Исятда за хирер сагъар хъийизва.

Ильяс Тажидиновичан лайихлувилер «За укрепление межнационального мира и согласия» гьуьрметдин знак, «Участник СВО», «За отличную службу на Кавказе», «За воинскую доблесть», «За боевое отличие» ва маса медалар гуналди къейднава.

Саид Булханов 1988-йисан 16-ок- тябрдиз Кьасумхуьрел дидедиз хьана. Ада Кьасумхуьруьн 2-нумрадин юкьван мектеб акьалтIарна, Махачкъалада бухгалтервилин пеше къачуна.

Ватандин вилик пак буржи кьилиз акъуддай вахт атайла, С. Булханова Каспийскдин флотилияда къуллугъна.

Дяведин махсус серенжем башламиш хьайила, Саид Алдеровича Россиядин оборонадин министерстводихъ галаз икьрар кутIунна. Младший сержант Булханова, отделенидин командир яз, миллетбазрихъ галаз гзаф женгера иштиракна. Адал пуд сеферда залан хирер хьана. Госпиталра сагъар хъувурдалай гуьгъуьниз ада СВО-дин зонада вичин везифаяр давамар хъувуна.

«Женгинин юлдашар, жуван хайи стхаяр хьиз, рикIиз чими жеда», – лугьузва ­Саид Алдеровича.

Алай вахтунда С. Булханов женгера хьайи хирер сагъар хъувунал машгъул я.

Саид Булхановахъ къалурай кье­гьал­вилерай ганвай Суворован, «Участ­­нику специальной военной опе­рации», «177-полк морской пехоты», «За проявленную доб­лесть» медалар ва маса шабагьар ава.

С. Булханова Дагъустандин госу­дарст­водин педуниверситетдин физи­ческий факультетдин 1-курсуна кIел­­зава.

Россиядин вири агьалийрин хьиз, Ильяс Таймурован ва Саид Булханован вил Ук­раинадин миллетбазри кьил кутур метлебсуз, инсафсуз дяве­дин гьерекатар куьтягь хьунал ала. Абур инанмиш тирвал, чи кар гьахълуди я, гьавиляй гъалибвални Россиядин Яракьлу Къуватрин пата жеда.

Лугьуз жеда хьи, Ильяс Таймуров­, Саид­ Булханов хьтин кьегьал, рухвайри чпин ватанпересвилелди дагъ­­вийрин тарих чи йикъара кхьин да­ва­марзава.

Дявеяр акьалтIрай. Къуй вири дуьньяда ислягьвал хьурай!

Хазран Кьасумов