«Ватан патал ви игитвал гьами­шалугъ­ди я. Ви тIвар рикIера эбеди хьурай, Аскер!» Дяведин майданда чан гайи игитриз, кьегьалриз талукь яз лугьузвай и гафарин маналувал, деринвал хуьн чалай аслу тирди рикIелай ракъурдай ихтияр чахъ авач. Игитар рикIел хуьн – им чна Ва­тан хуьнин рекье къурбанд хьайи къагьриманриз ийизвай гьуьрметдин лишан я. Чна неинки абур рикIел хуьн, гьакIни жуван уьмуьрни и кьегьалриз лайихлу жедайвал кьиле тухун лазим я.  ГьикI лагьайтIа, идахъ галаз сад хьиз чна чи инсанвилин, ватанпересвилин ивирар, тарих рикIел хуьзва.

Ихьтин фикиррал алаз и мукьвара Мегьарамдхуьруьн райондин Билбил-Къаз­май­рин хуьре СВО-дин женгера телеф хьайи хуьруьнви, Суворован тIварунихъ га­лай медалдин сагьиб  Гьамидов Тагьир Гьас­нудиновичан экуь къамат рикIел хуьниз талукьарнавай кьве мярекат кьиле фена.

Тагьир Гьамидов 2000-йисан­ 18-февралдиз  Каспийск шегьер­да дидедиз хьана. 2007-йисуз­ гада Билбил-Къазмайрин М.Аб­дул­лаеван тIварунихъ галай школадин 1-классдиз фена. Тарсара агалкьунралди, чIехибуруз гьуьр­мет авуналди тафаватлу Тагьир 2009-2017-йисара аялринни жаванрин спортдин «Самур» школада боксдални машгъул тир. Ада спортдин рекьяй акъажунра иштиракзавай, грамотаяр, медалар къачузвай. Хуьруьн мектебдилай­ кьулухъ Каспийскда колледж  акьал­­тIарай жегьилди военный порт эцигзавай чкада цин кIаник  технический кIвалахар кьиле тухузвай участокда кIвалахиз башламишна.  И вахтунда ада военный рекьяй къуллугъдизни гьазурвал аквазвай – им адан виридалайни еке мурад тир.

2022-йисан апрелдиз Т.Гьами­дов  кIва­лах­дилай элячIна ва СВО-да военный къуллугъ авун патал гуьгьуьллудаказ икьрар кутIунна. Ада женгинин гьерекатрин кIвен­кIве авай мотострелковый полкуна къуллугъзавай. 2023-йисан 21-июндиз Тагьир ва адан женгинин дустар, Запорожьедин областдин Токмак шегьерда вилик эцигнавай месэла кьилиз  акъудзавай вахтунда яракьдин цIук акатна. Хьайи хирер себеб яз, вич-вичел хтун тавуна, кьегьал гадади 3-августдиз Москвадин госпиталда чан гана.

Украинадин мул­ку­нал къуллугъ тамама­рай вахтунда хьайи агалкьунрай Тагьир Гьа­мидов са кьадар грамотайриз ва медал­риз лайихлу хьана. Абурун арада РФ-дин Президентдин къа­рар­далди ганвай Суворован тIва­рунихъ галай медални ава.

21-октябрдиз ватанпересвилин «Игитдин парта» проектдин сергьятра аваз,  Бил­бил-Къазмайрин юкьван умуми образовани­дин М.Аб­дуллаеван тIварунихъ галай мектебда выпускник Тагьир Гьамидован экуь къамат рикIел хуьниз талукьарнавай мяре­кат кьиле фена. С.Бейбалаевадин жавабдарвилик­ кваз тешкилнавай и мярекатда­ хуьруьн администрациядин кьил Н.Шагь­па­зова, алай вахтунда СВО-да къуллугъун давамар­за­вай юлдашри, хуьруьн патав гвай погранзаставадин векилди, рагьметлу Тагьиран багърийри, мукьва-кьи­лийри, адан классдин руководитель Э.Саидовади, тарс гайи маса муаллимри иштиракна.

Кьегьалдин уьмуьрдин рекьикай, адан агалкьунрикай рахайдалай кьулухъ, школа­да Гьамидов Тагьир Гьаснудиновичан тIвар­цIихъ  галай суьре ачухна.

2-ноябрдиз Билбил-Къаз­май­­рин хуьре Т.Гьамидован тIвар­­цIихъ­ галаз алакъалу яз теш­кил­на­вай мад са мярекат – Мегьарамдхуьруьн райондин жаванрин­ арада футболдай турнир кьиле фена. Пакаман сятдин 9-даз ­башламишай, саки няналди давам хьайи спортдин мярекатда ругуд хуьруьн – Мегьарамдхуьруьн, Билбил-Къазмайрин, Ги­лий­рин, Советский хуьруьн, Филерин ва Чах­чарин командайри иштиракна.

Къейд ийин, командайрин акъа­­жунар­ Билбил-Къазмайрин хуь­руьн жемятдин теклифдалди ва гьевеслудаказ и карда иштиракай ксарин куьмекдалди, «Чкайрилай теклифар» проектдин сергьятра аваз, са шумуд йис идалай вилик хуьруьн юкьвал, спортзалдин­ патав ачухай ва алай аямдин вири истеми­шунриз жаваб гузвайвал туькIуьрнавай спортдин майдандал кьиле фена.

Мярекат тешкилунин карда­ Билбил-Къаз­майрин админист­ра­циядин кьил Низа­ми Шагьпазо­ва, хуьруьн М.Абдуллаеван тIва­ру­нихъ галай СОШ-дин директор­ Тимур Саидова, хуьруьн мис­­кIин­дин имам Ильяс гьажи Аба­сова, Тагьирхуьруьн-Къазмайрин ДЮСШ­-дин футболдай тренер­ Муслим Рамазанова, гьакIни кье­­гьалдин багърийри, мукьва-кьи­лийри куьмекар гана.

Ильяс гьажиди чаз хабар гайи­вал,  стадиондин патав  турнирдин­ иштиракчийриз ва мугьманриз тIуь­нар  ва самовардин чай тек­лифзавай. Гьевеслудаказ кьиле фейи акъажунра 200-далай гзаф ксари иштиракна. Жаванар патал им иллаки рикIел аламукьдай итижлу  мярекат хьана.

Турнирдин нетижада 1-чкадиз (15 агъзур манат)  Советский хуьруьн команда лайихлу хьана.  Кьвед лагьай чка (10 агъзур манат) Билбил-Къазмайрин  командади кьуна. Пуд лагьай чка ва 5 агъзур  манат Гилийрин хуьруьн командадиз хьана. Гъалибчийриз гьакIни кубокар, медалар гана.

«Рагьметлу Тагьир вични­ спортдал рикI алай гада тир, адан тIварцIихъ галай турнирни кутугайди хьана. И карда зегьмет чIу­гур гьар са касдиз – спонсорриз, мярекат тешкилиз куьмек гайи­буруз, тренерриз, вири мугьманриз заз къе пара сагърай лугьуз кIанзава. Коман­дайрик кваз ишти­ракай аялриз заз кьетIендаказ сагърай лугьуз кIанзава — гзаф ерилу футбол къалурна абуру чаз къе», — разивилелди къейдна школадин директор Тимур Мурадо­вича.

Жасмина Саидова