Гъиле кьур кар кьилиз акъудун патал дуьзгуьн пешекар, устад чарасуз герек тирди виридаз чизва. Амма эхиримжи йисара чи республикада халкьдин майишатдин гзаф хилерин идарайриз, карханайриз, майишатриз чпихъ я чирвал, я алакьун, я бажарагъ авачир ксари, са нин ятIани рухваяр, хтулар, дустар я лугьудайбуру “регьбервал” гана. Нетижада барбатIвилерал, татугайвилерал, коррупциядин дарвазар ачухунал ва халкьдин яшайишдин дережа агъуз аватунал гъана. Республикадин экономика сакIани вилик фенач. Гафар-чIалар цIалцIамбур, халкьдиз кIанибур, крар лагьайтIа, — чпин хийирдихъ, нефсерихъ. Ихьтин гьалари, рафтарвилери сагъ са несилдик чIуру ерияр, регьятдиз пулар къазанмишунин вердишвилер кутуна, обществодизни зиян гана. Гьелбетда, яргъалди икI кьиле фин мумкин тушир.
Дагъустан Республикадин Кьилиз Владимир Васильев атайла, ада республикадин метлеб авай къуллугърал тайинарунин адетар дегишарна. Кьилин фикир кас нин вуж ятIа, гьадаз ваъ, адан пешекарвилиз, чирвилериз, кар бажармишунин алакьуниз, хивез къачузвай везифайрив намуслувилелди, жавабдарвилелди эгечIуниз гана. Кар алакьдай бажарагълу ксар жагъурун патал “Зи Дагъустан” конкурсни кьиле тухвана. Адан нетижаярни разивалдайбур я.
Кадрияр хкягъунив эгечIзавай тегьер саки вири районра, шегьерра сад тир. Дербент райондани. И кар мукьвара райондин кьилин къуллугъдал тайинарнавай Фуад Шихиевазни успат хьана. Администрациядин регьбервал гудай къурулушда къуллугъар кьунвай ксаривай дуьзгуьн истемишунар ийиз эгечIнамазди, цIудалай виниз къуллугъчияр кIвалахдилай хъфена. Абурун чкайрал ихтибар ийиз жедай пешекарарни жагъурна кIанзава. И кар патални Ф. Шихиева Дагъустан Республикадин Кьил Владимир Васильеван тежрибадилай чешне къачузва.
Чаз малум хьайивал, райондин администрацияди РД-дин Кьилин ва Гьукуматдин Администрациядихъ галаз санал идарайра кIвалахдай дуьзгуьн пешекарар жагъурун патал “Зи Дагъустан — зи Дербент район” конкурс кьиле тухудайвал я. Ана хуш авай гьар садавай иштиракиз жеда. Конкурсдин гъалибчийриз администрацияда, райондин майишатдин хилера къуллугъарни теклифда.
Дербент райондихъ яшайишдин, экономикадин рекьяй йигин камаралди вилик фин патал зурба мумкинвилер ава, амма абурукай икьван гагьда тамамвилелди менфят къачузвачир. Федеральный, республикадин программайрик экечIзавачир. Баркаван чилер анжах маса гунал машгъул тир жавабдар ксар. Гьакъикъатдани, районда яргъал йисара агьалияр наразивилел гъизвай хъвадай циз, рекьериз, образованидиз, культурадиз, медицинадиз талукь месэлаяр гьялзавачир. Къе ихьтин татугайвилерин рехъ агалнава. Райондин кьил хъсанвилихъ дегишвилер твадай рекьерихъ къекъвезва. И кардал райондихъ, республикадихъ рикI кузвай ксар желбзава.
Хийир Эмиров
