Мегьарамдхуьруьн райадминистрациядин пресс-къуллугъди хабар гузвайвал, алатай гьафтеда Приморский хуьре кардик квай сагъламвал мягькемардай гатун «Самур» лагерда баскетболдай Россиядин, спортдин международный классдин мастер, спортдин и жуьредай уьлкведин зайифдаказ ван къвезвайбурун хкянавай командадин член, уьлкведин чемпионатдин са къугъуна виридалайни гзаф очкояр къазанмишунай рекорд эцигуналди, Россиядин рекордрин ктабда гьатнавай Алексей Миронован иштираквал аваз къугъунар кьиле фена. Абурун тешкилатчи райондин администрациядин физический культурадин ва спортдин отдел тир.
А.Миронов республикадин жуьреба-жуьре районриз мугьман жез са шумуд йис я. И кардин макьсад бажарагъ авай аялар жагъурун, сагълам уьмуьр раиж авун, гьакIни районрин муниципалитетрин кьиле авай ксарин регьбервилик кваз анра физический культура ва спорт вилик тухун я.
Винидихъ тIвар кьунвай чешмеди мадни хабар гузвайвал, спортдин къугъунар тешкилунай райондин физический культурадин ва спортдин отделдин директор Эльбрус Шагьвеледов шабагьдиз лайихлу хьана.
Регина Самедова
