Алатай ислендиз Дагъустандин Кьил С.Меликова Махачкъаладин «Динамо» футболдин клубдин Къаюмвалдай советдин заседание кьиле тухвана. Идакай ва «Динамодин» цIийи тренердикай чаз Дагъустандин физический культурадин ва спортдин министерстводин пресс-къуллугъди хабар гана.
Заседанидал С.Меликова клуб кIвачел ахкьалдар хъувунилай разивал къалурна. Республикада массовый спорт вилик тухунал гьалтайла, адан роль екеди тирди къейдна. Ада гьакIни пешекарвилин командадилай гъейри, жегьил футболистар гьазурдай «Динамо-2» командадални фикир желбна. «Динамо» клуб кIвачел акьалтна алатнавай кьве йисуз футболистри Россиядин кIвенкIвечивал патал акъажунра ва Сад лагьай Лигада агалкьунралди иштиракайди къейд авунихъ галаз сад хьиз, С.Меликова клубдин вилик цIийи — Россиядин премьер-лигадиз гьахьунин — везифа эцигна. Ада и жигьетдай клуб финансламишун патал чIехи организацийрихъ галаз рахунар кьиле тухудайдини, футболдин клубдин ва аялрин командадин инфраструктура гегьеншардайдини раижна.
Заседанидал Сергей Меликова «Динамодин» цIийи тренер Къурбан Бердыевахъ (шикилда) агалкьунар хьана кIанивилин келимаярни лагьана.
— Къурбан Бекиевич дуьньядин футболдин майданра вичикай хабар авай, машгьур пешекаррин арада чка кьунвай кас я. Ам гила чи республикада хьунал чна шадвалзава! – къейдна республикадин Кьили.
Гаф кватай чкадал лугьун лазим я хьи, Къ.Бердыеван агалкьунрик чемпионрин Лигада ва Европадин Лигада иштиракун ква. Адан регьбервилик кваз Казандин «Рубин» уьлкведин чемпионвилин тIварцIиз кьве сеферда, Россиядин Суперкубокдиз лайихлу хьайиди рикIел хквезва. Идалай вилик тренерди «Сочи» ФК-диз регьбервал гана.
Эхирдай заседанидал «Динамодин» Къаюмвалдай советдин цIийи председателвиле Сергей Меликов хкяна.
Регина Семедова
