Дагъустан Республикадин чирвилерин тешкилатра коронавирусдин садакай масадак акатдай азар чукIунин вилик пад кьун патал са жерге серенжемар кьабулзава. Абурулай гъейри, РД-дин образованидин ва илимдин министерстводи мектебриз ва аялрин бахчайриз мажбури тушиз, чпин хушуналди фидай ихтияр авайдан гьакъиндай къарар кьабулнава. И кардикай министерстводин пресс-къуллугъди хабар гузва.
Школадиз фидай яш тахьанвайбурун идарайриз хушуналди фин 18-мартдилай 1-майдалди, умуми образованидинбурузни гатфарин каникулар башламиш жедалди кардик кутазва.
Каникулрин вахт куьтягь хьайила, мектебра азардин вилик пад кьадай кьетIи серенжемрин шартIара кIелун давамарда ва я и кар республикада, эпидемиологиядин гьалдилай аслу яз, дистанционно, яни арада мензил аваз, кьиле тухуда.
Пешекарвилин чирвилер гудай ва кьилин образованидин идарайриз программа чирунин кIвалах дистанционно кьиле тухунин ва я практикадин тарсар маса вахтунда тухунин тапшуругъ ганва.
Кьабулзавай серенжемри республикадин мулкунал азар чукIунин хаталувал лап тIимилардай мумкинвал гуда.
* * *
Гьуьрметлу юлдашар, соцсетра бязибур кичIевилин велвела (паника) тваз алахънаватIани, адаз рехъ гудай себебар авач. Алай вахтунда чи республикада ОРВИ ва грипп акатнавай 2721 дуьшуьш малум хьанва, им эпидпорогдилай 2,3 сеферда тIимил я. Ихьтин гьалар чи регионда январдизни авай. Къенин юкъуз Дагъустанда коронавирус авач. Идакай РД-дин здравоохраненидин министерстводи хабар гузва.
Дагъустандин здравоохраненидин министерстводи кьиле тухвай ахтармишунри къалурайвал, эгер эпидемия арадал атайтIа, республикадин медицинадин идараяр лазим тир вири раб-дарманралди таъмин я. Идалайни гъейри, лазимвилиз килигна, азарханайра нефес чIугвадай 700 аппарат авазва. Министерство алава тадаракар маса къачунин къайгъуйрик ква.
Кискис гуниз (провокация) яб тагун тIалабзава, чIуру ванер чукIурзавайбур халкьдихъ рикI кун тийизвай, анжах чпин хийирдихъ ялзавай, гьакъикъатда и месэладикай хабар авачиз агьалийрин арада къалабулух, гъулгъула твазвай ксар я. КичIевал акатмир, гъулгъуладиз рехъ гумир! Стрессри иммунитет агъуз вегьезвайди я. Ам лагьайтIа, садакай масадак акатдай азаррихъ галаз женг чIугвазвай, чи сагъламвал хуьзвай кьилин такьат я. Чна анжах официальный чешмейрихъ ихтибаруниз эвер гузва. Чи макьсад азарлуйриз куьмек гун я, чаз куьн чи гъавурда дуьз акьуна, мергьяматлувал къалурна кIанзава.
Чаз эхиримжи вахтара виридалайни гзаф гузвай суал медицинадин маскайриз талукьди я. Дугъриданни, чи ва къецепатан уьлквейрани абурун кьитвал ава. Себеб агьалийри коронавирусдихъай кичIе хьуникди абур виликамаз маса къачун, кIвалера хуьн я. Абуралди еке къазанжияр къазанмишиз алахънавайбурни кими туш. Гьаниз килигна маскайрин къиметар багьа авунихъ ва абур аптекайра тахьунихъ галаз Федеральный антимонопольный къуллугъди (ФАС) Роспотребнадзордихъ галаз санал женг чIугвазва.
«Лезги газет»
