РФ-дин просвещенидин министерстводи Россиядин вири школайра кIелзавай аялрин олимпиадайрин календардик дегишвилер кухтада, хабар гузва идарадин информациядин къуллугъди.
Аялрин сагъламвал уьлкведив агакьнавай коронавирусдикай хуьн патал кьабулзавай серенжемрикай яз, Россиядин просвещенидин министерстводи уьлкведин школайра кIелзавай аялрин олимпиадайрин эхиримжи пай кьиле тухудай вахт ва чкаяр дегишарун фикирдик квайдакай вири регионар хабардарнава. ГьакIни министерство, Олимпиада кьиле тухунин къайдадик кухтадай дегишвилер гьазурдайла, онлайн-технологийрикай менфят къачунин мумкинвилериз килигзава. И дегишвилер Олимпиададин вахтунда къуватда гьатда. Талукь тир малуматар, хабар гузвайвал, гьар са субъектдиз рекье тунва.
Олимпиада умуми образованидин 24 предметдай (математикадилай башламишна, ОБЖ-див агакьдалди) кьиле тухузва. Ам кьуд паюникай ибарат я ва иштиракчийриз школайра, муниципалитетра, регионда кьиле фейи ва эхиримжи паюна хкянавай тарсарай чпин виниз тир алакьунар къалурдай мумкинвал гузва.
Алай йисуз Олимпиада уьлкведин вири регионра кьиле тухвана ва адан 20-мартдиз кьиле фин лазим тир эхиримжи паюниз мектебра кIелзавай тахминан 5600 аял акъатна.
Олимпиада кьиле тухудай йикъар ва чкаяр мукьвара малум жеда, хабар гузва РД-дин образованидин ва илимдин министерстводи. КIвенкIвечи чкаяр кьурбуруз, хиве кьунвай вузрик экечIдайла, гудай кьезилвилер вири къуватда амукьда.
“Заз виниз тир алакьунар нетижалудаказ малумарай гьар са касдин лайихлувилер къейд ийиз кIанзава. Чи школайра кIелзавай аялар чпин чирвилералди виниз тир дережайрив агакьарунин къастунал кIеви хьун чна гьам уьлкведин къенепата, гьамни международный интеллектуальный акъажунра къейдзава”, — лагьана РФ-дин просвещенидин министр Сергей Кравцова.
Ада хабар гайивал, пешекаррин советдихъ галаз санал министерстводи мумкин тир рекьер кьве фикирдал кIевивал авуналди ахтармишнава — жезмай кьван вини дережада аваз аялрин сагъламвал хуьн ва гьа са вахтунда, бажарагълу аялриз куьмек гудай рехъ яз, Вирироссиядин олимпиададин эхиримжи пай кьиле тухудайвал авун. “Мярекат кьиле тухудай вахт дегишарун ва милли “Образование” проект себеб яз кардик кутазвай онлайн-технологийрин мумкинвилерикай менфят къачун, — им вири терефар ахтармишна, алцумна, кьабулнавай къарар я. Месэла регионрихъ галаз тамамдаказ веревирд авурдалай кьулухъ чна Олимпиададин иштиракчийриз ва абурун диде-бубайриз хабар гуда”, — лагьана С.Кравцова.
Къейд ийин: Вирироссиядин олимпиадада школайра кIелзавай аялри 5-классдилай башламишна иштиракзава. 2016-йисалай инихъ миллетдин интеллектуальный акъажунра урус чIалай ва математикадай гъвечIи классрин (4-классра кIелзавай) аялривайни иштиракиз жезва. Адет хьанвайвал, гьар йисуз Олимпиадада мектебра кIелзавай са шумуд миллион аялди иштиракзава. Школайра, муниципалитетра ва регионра жезвай паяр алатай йисан сентябрдилай февралдалди кьиле тухванай.
Амина Муслимова
