12-мартдиз Дагъустандин Кьил Владимир Васильев Абдулжелил Абдулкеримовахъ галаз гуьруьшмиш хьана. Гуьруьш кьиле фидай чIавуз республикадин Кьили чи ватанэгьли, “Люминарий” проектдик кьил кутур кас тир А.М. Абдулкеримоваз хуьрерин мулкар вилик тухунин барадай еке метлеб авай проектар кьилиз акъудуник еке пай кутунай ва активнидаказ мергьяматлувилин кIвалах тухунай “Хайи чил кIан хьунай” Дагъустан Республикадин гьуьрметдин лишан гана.
Владимир Абдуалиевича Абдулжелил Магьмудовичан бубадиз — мергьяматлувилин фондунин президент, РД-дин лайихлу муаллим тир М.А.Абдулкеримоваз яшайишдинни культурадин жигьетдай важиблу проектар бажармишуник пай кутунай рикIин сидкьидай сагърай лагьана. Владимир Абдуалиевични муаллимдин хизанда чIехи хьайиди я. Образованидихъ, просвещенидихъ Дагъустан патал гьикьван важиблу метлеб аватIа, гьа кар адаз лап хъсандиз чизва.
А.М.Абдулкеримов РД-дин лайихлу муаллим М.А.Абдулкеримован тIварунихъ галай “Просвещение” фондунин асул меценат я. Ада пулдин куьмекар гуналди ва къаюмвал авуналди Ахцегь районда ва маса районрани 2008-йисалай инихъ са жерге проектар кьилиз акъуднава. Савадлувилин “Люминарий” центр, са шакни алачиз, Фондунин виридалайни машгьур ва жанлу проект я. Проектдик кьил кутур Абдулжелил Магьмудовича чпин бубади гайи теклифар стхаяр тир Абдулкеримоврин къуватралди, хизандин фонд арада аваз, бажармишзавайди ва Дагъустандин абадвилихъ элкъуьрнавай и кIвалах давамардайди къейдна.
* * *
Карчи ва Дагъустандин патай Федерациядин Советдин член Сулейман Керимоваз “Дагъустан Республика яшайишдинни экономикадин жигьетдай вилик тухуник пай кутунай” медаль ганва. 12-мартдиз (сенатор хайи юкъуз) талукь тир Указдал региондин регьбер Владимир Васильева къул чIугуна. Идан гьакъиндай “Лезги газетдиз” республикадин Кьилин ва Гьукуматдин Администрациядин пресс-къуллугъди хабар гана.
“Дагъустан Республика яшайишдинни экономикадин жигьетдай вилик тухуник чIехи пай кутунай ва гзаф йисара бегьерлудаказ кIвалахунай Сулейман Керимоваз “Дагъустан Республика яшайишдинни экономикадин жигьетдай вилик тухуник пай кутунай” медаль ганва”, — раижзава малуматда.
РикIел хкин, С.Керимов 1966-йисуз Дербент шегьерда дидедиз хьана, 2008-йисалай инихъ ада Россиядин парламентдин вини палатада республикадин патай векилвалзава. Виликдай адаз “Дагъустан Республикадин вилик лайихлувилерай” орден (2013-йисан апрель) ва «Хайи чил кIан хьунай” гьуьрметдин лишан (2016-йисан март) гайиди я.
* * *
11-мартдиз Москвада мергьяматлувилин “Артист” тIвар алай фондунин “Гьисаба кьун” (“Признание”) премия вахкунин мярекат кьиле фена. И премия Россиядин жуьреба-жуьре регионрай тир 20 артистдиз, театрдинни кинодин работникриз абуру уьлкведин культура вилик тухуник гзаф йисара гьакъисагъвилелди пай кутунай ганвайди я.
Лауреатриз Чарли Чаплинан кIалубда авай рикIел хуьдай статуэтка — “Артист” фондунин лишан ва пулдин премия гана.
Лезги театрдин директор Динара Эминовади кIевелай къайгъударвал авунин нетижада лауреатрин сиягьдик лезгийрин СтIал Сулейманан тIварунихъ галай госмуздрамтеатрдин актер, Россиядин лайихлу артист Абдуллагь Гьабибован тIварни акатна. А.Гьабибов Дагъустандин виридалайни еке тарих авай театррикай сад тир Лезги театрдин сегьнедал экъечIиз 50-йисалай гзаф вахт алатнава. И девирда актерди милли театрдин сегьнедал саки 150-дав агакьна жанлу къаматар арадал гъана. Абдуллагь Гьабибов сегьне патал халкьнавай бажарагълу пешекар актеррикай сад я.
“Фикир гунай, зегьметдал къимет эцигунай заз театрдин руководстводиз, кIвалахдин рекьяй юлдашриз сагърай лугьуз кIанзава. Лайихлувилер гьисаба кьун, гьуьрмет авун рикIиз гзаф хуш жедай кар я”, — лугьузва А.Гьабибова.
«Лезги газет»
