И йикъара Дербент райондин кьил Мавсум Рагьимов Агъа Рукель хуьре вагьши гьайванар хуьдай питомник арадал гъанвай Ирина Куликовадин тавакъу веревирд ийиз чкадал фена. Ирина Куликовади вичин арзада тамун гьайванар хуьзвай кьилдин чка 4 йисан къене хъвадай цикай магьрум тирдакай хабар гана. “Питомникда кьве вишелай гзаф гьайванар ава: север, жанавурар, асланар, пеленгар, девеяр ва къушар. Гьайванриз йикъа 3-4 сеферда яд гана кIанзава. Са севре йикъа 4 ведро яд хъвазва. Ихьтин чими вахтунда абур цихъ къанихвиляй кьиникьни мумкин я”, — лугьузва Ирина Куликовади.
Гьайванриз гун патал Куликовадин хизанди гьар юкъуз ругуд тонн яд заказ гузва. Гагь-гагь чпин хсуси улакьда авазни гъизва.
Чкадал алай гьаларихъ галаз таниш хьайидалай кьулухъ М.Рагьимова, Дагъустанда ихьтин санани авачир хьтин зоопарк Дербент районда хьун чIехи зегьмет ва агалкьун тирди къейдна. Цин месэла райондин кьили вичин гуьзчивилик кутуна. Ам энгел тавуна гьялун райондин собранидин депутат Тигран Абдулгьамидовал ихтибарна. Вичин нубатда депутатди и месэла са шумуд йикъан къене агалда лагьана хиве кьуна. Ада вичи гайи гаф кьилизни акъудна. Алай вахтунда вагьши гьайванар хуьзвай чка хъвадай целди таъмин я. Куликоврин хизанди питомник патал еке метлеб авай месэла са куьруь вахтунда гьялай Тигран Абдулгьамидоваз ва Мавсум Рагьимоваз сагърай лагьана.
М.Рагьимова Агъа Рукель хуьруьз мугьман хьайи чIавуз чкадин агъсакъалрихъ галаз гуьруьшни кьиле тухвана, абурухъ галаз хуьре авай месэлаяр веревирдна. Вири крар гьасятда гьялиз тахьайтIани, экверин месэла, яргъал тевгьена, гьялдай меслятдал атана.
Къагьриман Ибрагьимов
