И йикъара Мегьарамдхуьруьн райондин Советский хуьре Гьасановрин кIвале эдебиятдин “Булах” кIватIалдин вад йисан юбилейдин мярекат шад гьалара кьиле фена. ТIугъвал себеб яз, мярекатда иштиракиз кIанзавай виридавай аниз къвез хьанач.
Низами ва Гуьзеля Гьасановри мугьманар чпин кIвале шаддиз кьабулна. Мугьманрин арада Голландиядай хтанвай шаир Гуьлжагьан ва адан уьмуьрдин юлдаш Темирхан Мисрихановар, Кьасумхуьруьн телеканалдин (КТВ) мухбир Музамудин Магьмудов, шаирар тир Гъулангерек Ибрагьимова, Тамила Салманова, Сейфудин Шагьпазов, Надим Абдулаев, Лаина Магьмудова, и цIарарин автор ва масабур авай.
Лезги писателрин Союздин регьбер Сардар Абила, писатель Нариман Ибрагьимова, шаир Шагьабудин Шабатова ва масабуру тебрикдин телер ракъурнавай.
Мярекат эдебиятдин “Булах” кIватIалдин регьбер Гуьзеля Гьасановади кIватI хьанвайбуруз юбилей тебрик авуналди ачухна.
РикIел хкин. 2016-йисан гатуз, интернет себеб яз, Урусатдин ва дуьньядин жуьреба-жуьре пипIера авай яратмишдай инсанар сад-садав агудунин, абурун кьадар гзаф хьунин ва интернетдин майданра кхьизвай эсерар чапдай, абур веревирд ийидай мумкинвилер хьунин нетижада эдебиятдин кьилдин кIватIал тешкилдай фикир арадал атана. И кардин кьиле акъвазайдини Санкт-Петербургда муаллим яз кIвалахзавай Гуьзеля Гьасанова тир. Вичин рахунра ада кIватIал арадал гъуникай, адан кьилин макьсадрикай гегьеншдиз суьгьбетна.
КIватIалдин сифте гуьруьшда Нариман Ибрагьимова, Шагьабудин Шабатова, Гуьлжагьан Мисрихановади, и цIарарин авторди, Музамудин Магьмудова, Сейфудин Шагьпазова, Ражадуллагь Салманова, Марьям Алискеровади, Владик Батманова, Кьасумхуьруьн телеканалдин векилри ва масабуру иштиракнай.
5 йисан юбилейдин мярекатдик атанвайбуру чпин цIийи эсерар кIелна, “Булахдин” кIвалахдиз хъсан къимет гана, лезги халкьдин тIал алай бязи месэлаяр, чIал хуьнин ва вилик тухунин рекьер веревирдна.
Хайи чIал хуьз, раиж ийиз ва вилик тухуз “Булах” кIватIалди интернетда тухузвай кIвалах тариф авуниз лайихлу я. Къуй адахъ и рекье мадни чIехи агалкьунар хьурай!
Къагьриман Ибрагьимов
