Эхиримжи вахтара коронавирусдин йигинвал артух хьанва. ТIегъуьн акатзавайбурун, азардик рекьизвайбурун кьадар тIимил жезвач. Коронавирусдик са йикъан къене 20-25 кас кьейи дуьшуьшарни малум я. Ихьтин гьалар фикирда кьуна, Роспотребнадзордин Дагъустанда авай Управлениди яшайишдин са шумуд хиле кIвалахзавайбур коронавирусдиз акси рапар ягъуниз мажбур авунва. Талукь къарар къуватда гьатна са шумуд югъ алатнава.

Лагьана кIанда, мажбуридаказ рапар яна кIанзавайбур сиягьдик агьалияр санай-масаниз тухудай улакьра (общественный транспорт) кIвалахзавайбурни акатнава. Каспийск шегьерда хейлин йисара маршруткадал кIвалахзавай Аслан Халилова мукьвара коронавирусдиз акси раб яна. Чи газетдин мухбирдихъ галаз кьиле фейи рахунра ада къейдна:

«Къенин юкъуз раб ягъун тIегъуьндиз акси женгина виридалайни хийир авай рехъ я. И кар пешекаринни тестикьарзава. Зи фикирдалди, духтуррин меслятрал амална кIанда.

Зи кIвалах гзаф кьадар инсанрихъ галаз алакъада авай кIвалах я. ТIегъуьн акатунин хаталувал екеди я. Жув ва жуван хизанар сагъ-саламатдиз хуьн патал зун раб ядай фикирдал атана. Жуван дустаризни, чирхчирризни, виридаз за коронавирусдиз акси раб ягъун теклифзава», — лагьана А.Халилова.

«Лезги газет»