Дербент райондин кеферпата авай саки вири чилер хуьруьн майишатдин хилез желбнава. ЦипицIлухрин, емишрин багълари ва салан майвайрин майишатри гъизвай къазанжийри райондин экономика мягькемарзава. Алатай йисуз райондин бюджетдиз налукринни налукар тушир къазанжийрилай алава яз 130 млн манат пул атана.
И йикъара РД-дин Гьукуматдин Председатель Абдулмуслим Абдулмуслимов Дербент райондиз мугьман хьанвай. Сифте нубатда ада 75 гектарда ципицIрин цIийи багълар кутунвай «Татляр» агрофирмадал кьил чIугуна.
Майишатдин регьбер, РД-дин Халкьдин Собранидин депутат Азад Гьажиева чIехи мугьмандиз гзаф муьштерийриз кIанзавай ва бегьерлувал 200 центнердив агакьзавай, гьакIни вини дережадин ширинвал авай технический сорт тир «Первенец Магараша» ципицIрикай ихтилат авуна. ЦIийиз кутунвай ципицIлухриз стIал-стIал яд гудай къайда ишлемишнава. Бегьер комбайндалди кIватI хъийидайвал я. Санлай майишатда 1700 гектар чил ципицIлухри кьунва. Сортар са шумуд жуьре ава.
А. Абдулмуслимова ципицIрин хел вилик тухуник еке пай кутунай «Татляр» агрофирмадин регьбердиз сагърай лагьана. Идахъ галаз сад хьиз, ада Дагъустандин ципицIчийриз гузвай субсидийрин кьадар артухарай РД-дин уьзуьмчивилин Комитетдин зегьметни къейдна.
Ахпа ам виниз тир бегьер гудай багъдин проект кьилиз акъудзавай, Сабнова хуьре авай «Анжелина» ООО-диз фена. И подпроект «Дагъустанда емишринни майвайрин кластер вилик тухузвай» инвестпроектдин пай я. Ам кьилиз акъудзавай гьал РД-дин Кьил Сергей Меликован гуьзчивилик ква.
А. Абдулмуслимова авунвай кIвалахдиз еке къимет гана. Инвестордив 132 гектар чил вуганва. Проект кьилиз акъудуниз 250 миллион манатдилай гзаф харжар акъатда. Багъ кутунилай гъейри, «Анжелина» ООО-ди кьве агъзур тонн емишар хуьдай складни эцигнава. Саки кIуьд агъзур тонн емишар хуьдай са склад эцигунин проектни гъиле ава.
Инлай РД-дин Гьукуматин Председатель «ЮгВелАгро» ООО-дин салан майваяр цазвай майдандиз килигиз фена. Великент хуьруьн къвалав гвай мулкара лежберри кабачокарни истивутар цазвай чкадал расалмиш хьана. «ЮгВелАгро» ООО-дин гендиректор Марат Гереева авур суьгьбетдай малум хьайивал, майишатда пекиндин келем, бадамжанар, ширин истивутар ва помидорар цазва. ГьакIи ина, Дагъустанда сифте яз, 50 гектарда кабачокар цанва. Гележегда абур 100 гектарда цадай планар ава.
А. Абдулмуслимова майваяр цанвай питомникар ахтармишна, тум гьинай гъизва лагьана жузуна. М. Герееван гафаралди, тумни, штиларни Россиядай къачузва. 2024-йисан зулуз ада, гадарнавай буш чил къарагъарна, брокколи цада лагьайла, юлдашрин шаклувилизни килиг тавуна, 18 гектарда брокколи цана. Райондин администрациядин патай куьмек гуниз килигна алай йисан февралдин вацра а чиляй сад лагьай бегьер вахчуна.
— Чи чкада фад жезвай ва зулун культурайри хийир гузвайди чаз чизва. Чна цазвай вахтунда брокколи уьлкведа маса санани цазвач. За брокколи цаз гатIунайла, вирида арадал са шейни къведач лугьуз хьанай. За, абур цаз гатIундалди, юкIвар-чипIер яна, ахтармишунар авунвай. Иниз килигна, абур чи шартIара жедайдахъ зун агъунвай, — къейдна М. Гереева.
«ЮгВелАгро» ООО-ди алишверишдин «Магнит», «Пятерочка», «Дикси» компанийрихъ галаз икьрар кутIуннава. Гьасилнавай суьрсет абуруз ракъурзава.
А. Абдулмуслимова республикадин агропромкомплекс вилик тухуник пай кутунай «ЮгВелАгро» ООО-дин кIвалахдиз еке къимет гана ва РД-дин хуьруьн майишатдин министерстводал карханадиз куьмек авун тапшурмишна.
Цазвай майданриз килигайдалай гуьгъуьниз РД-дин Гьукуматдин Председателди хуьруьн майишат вилик тухуз чалишмиш авунай райондин администрациядиз сагърай лагьана. «Чи патай квез вири куьмекар гуда. За гьамиша лагьайди я ва лугьунни ийида: хуьруьн майишат Дагъустан Республика вилик тухузвай важиблу хел я. Чи вири чилерив кIвалахиз туна кIанда», — къейдна Гьукуматдин Председателди.
Къагьриман Ибрагьимов
