Афгъанистандикай ихтилат кватайла, 1980-йисара ана кьиле фейи дяведин гьерекатрикай хабар авайбурун рикIера пашманвал гьат хъийида. ГьикI лагьайтIа, ана интернационалиствилин буржи тамамардайла, чи гзаф жегьилар элкъвена хтаначир. ИкI, 1985-йисан сентябрдиз Вини СтIалдилай тир Фетилагьоврин хизандивни рикI къарсурдай чIулав хабар агакьнай: спецназдин разведчик Селимов Гьажи къизгъин женгера телеф хьана.
Гьажи Селимов 1984-йисуз Афгъанистандиз рекье тунай. Адан юлдаш, командир лейтенант Пермякова рикIел хкайвал, Гьажи буржидиз вафалу, гайи буйругъ ян тагана кьилиз акъуддай, викIегь аскер тир. Вилик жергейра хьун адан макьсад жедай. Ада гуманитарный куьмекдин машинрин колоннаяр 6 сеферда саламатдиз тайин чкадиз агакьарна. 12 сеферда разведкадин серенжемар тамамарна. Исахейл, Кундуз, Кандагар, Саланг, Ишкамуш вилаятра маджагьедрихъ галаз кьиле фейи женгера уьтквемвилелди иштиракна.
Адахъ галаз санал къуллугъ авур аскерри тестикьарайвал, са йифиз душманди частуниз минометрай гуьлле гана. Гьажидин къвалав гвай кьве аскерни кьена. Адал вичел хер хьана. ЯтIани ада цIай кьунвай алачухрикай залан хирер хьайи юлдашар саламат чкадиз акъудун патал чалишмишвална. Амма кьвед лагьай мина хъиткьинайла, Селимован бедендизни еке хасаратвал гана. Ам госпиталдиз тухудай рекье куьтягь хьана.
ВикIегь аскердин грамотаяр, Яру Гъед орден, «Жуьрэтлувиляй» медаль Вини СтIалрин юкьван школадин музейда хуьзва. Школадин цлал адан шикил алай кьул ала. Хуьруьн са куьчедиз Гьажи Селимован тIвар ганва.
Кьегьалар рекьидач, абурун экуь къаматар халкьдин рикIера гьамишалугъ амукьда.
Замир Мегьамедов
