ВикIегьвал, намуслувал, хайи чилел рикI хьун хьтин пак ерияр хас касдивай жеда вичин хивез уьлкведин таъсиб хуьнин жавабдарвал кьабулиз. Гьа ихьтинди тир полковник, РФ-дин Кьиблепатан военный округдин 18-армиядин командующийдин заместитель, женгинин гзаф орденринни медалрин сагьиб, хъуьлуьдви Мегьамеджанов Мегьамедали Камилович.
М.Мегьамеджанов 1967-йисуз Рутул райондин Хъуьлуьдрин хуьре дидедиз хьана. Зигьинлу, дирибаш гадади мектеб агалкьунралди акьалтIарна, колхозда кIвалахна. 1986-1987-йисара Советрин Армиядин жергейра къуллугъна. Чешнелу аскер частунин командирдин теклифдалди Рязандин высший воздушно-десантный командный училищедик экечIна. Анаг лап хъсандиз куьтягьай офицерди къуллугъдин рехъ Кеферпатан флотдин гьуьлуьн пияда кьушунрин 61-кьилдин бригададин 876-батальондин десантникрин взводдин командирвилин везифайрилай башламишна. КьетIен алакьунриз килигна, командованиди адал ахпа гьа бригададин десантно-штурмовой ротадин, 1994-йисалай Каспийдин флотилиядин 332-нумрадин кьилдин батальондин ротадин командирвилин, са йисалай гьа батальондин штабдин начальниквилин жавабдар везифаяр ихтибарна. 2016-2018-йисара Мегьамедалиди Сирияда къуллугъна. Хсуси чешнедалди аскерар руьгьламишиз алахъдай офицерди Чечен Республикада, къизгъин гьалар арадал атай маса чкайрани ягъунра иштиракна. Са шумудра адал хирер хьана. Украинадин неонацистрихъни фашистрихъ галаз ам гьа сифте йикъалай женгерик экечIна.
Къуллугъдин везифаяр лап хъсандиз кьилиз акъудзавай, дяведин илим чирунал алахъзавай ва вичин гъилик квай аскеррин саламатвилин къайгъуда авай чешнелу офицерди гьам командованидин, гьам женгинин юлдашрин патай гьуьрмет къазанмишна. И кардин гьакъиндай адан чинерал артух жезвай гъетери ва гьакI шабагьрини шагьидвалзавай.
Эхиримжи вахтунда полковник Мегьамедали Камиловича Кеферпатан флотдин гьуьлуьн пияда кьушунрин Яру пайдах авай Кирнессдин 61-бригададин командирвилин, РФ-дин Кьиблепатан военный округдин 18-армиядин командующийдин заместителвилин (им генералвилин къуллугъ я ва командованиди ам генералвилин чин гун патал къалурнавай) жавабдар везифаяр тамамарзавай. Ам женгинин са жерге орденризни медалриз лайихлу хьана. «За военные заслуги» ордендиз, «За заслуги перед Отечеством I и II степени», гьакI «За отвагу», Жукован, Суворован медалриз (вири 15).
Уьмуьрдин юлдаш Муслимат Шагьпазовнади — старший прапорщикди, гьуьлуьн пиядин бригададин сирлу частунин начальниквиле, Кеферпатан флотдин кьушунрин канцелярияда делопроизводителвиле жавабдар къуллугъар тамамарна, адазни командованидин патай ганвай шабагьар ава.
Донбасс азад хъувунин нубатдин женгина залан хер алаз Севастополдин госпиталдиз хкай викIегь полковник Мегьамедали Мегьамеджановаз духтурривай, гьайиф хьи, куьмекиз хъхьанач. Женгинин викIегь офицер, къени къилихрин гьуьрметлу инсан чавай вахтсуздаказ къакъатна. Вучда кьван, рагьмет хьурай, хизандиз, багърийриз сабурар гурай!
Женгинин дустари ам 17-февралдиз хайи хуьруьз хкана. Кучукдайла, кIватI хьун чIехи митингдиз элкъвена. Ватандин ЧIехи дяведа телеф хьайи баркаллу хъуьлуьдвийрин гьуьрметдай хкажнавай обелискдин (тарих тикрар жезва, адал чи игитдин чIехи буба Мегьамедалидин тIварни ала) вилик квай майдандал, игит полковник эхиримжи рекье тваз хуьруьн жемят, женгинин дустар, гьакI къунши хуьрерайни районрай, республикадин меркездай гзаф ксар атанвай.
Пашманвилин митинг «Хъуьлуьдрин хуьр» СП-дин кьил Ревшан Ражабова ачухна. Ада сифте гаф бригададин командир, генерал-майор Сергей Витальевич Пушкиназ гана.
— Кьиблепатан военный округдин 18-армиядин командующийдин заместитель, батальондин командир Мегьамедали Камилович Дагъустандин лап лайихлу, викIегь рухвайрикай сад тир. СВО-дин вакъиаяр башламишайла, ам вичи секиндиз къуллугъзавай Кеферпатан Заполярный округдай хтана, чIехи бубадин кар давамарун яз, нацистрихъ галаз женгерик экечIна. Гъилик агъзурдалай артух аскерар квай адавай, гьелбетда, хатасуз штабда ацукьна, женгиниз регьбервал ганайтIа жедай. Амма адаз масабурун далудихъ чуьнуьх хьун чидачир. Гьамиша къайгъударвал ийиз, командирди ватанпересвилин буржи игитвилелди кьилиз акъудна. Кьегьал хва тербияламишай диде-бубадиз, муаллимриз, вири хъуьлуьдвийриз баркалла! Женгинин дуст Мегьамедалидин экуь къамат чи рикIера эбеди яз амукьда, — лагьана генералди.
Теселли гудай башсагълугъвилин келимаяр РД-дин Кьил Сергей Меликован тIварунихъай РД-дин энергетикадин министр Марат Шихалиева, женгинин юлдашрин патай 18-армиядин командирдин заместитель генерал Валерий Бойкоди, РФ-дин Игит, Воздушно-десантный кьушунрин командующий, генерал-полковник Михаил Теплинскийди, Мегьамедалидихъ галаз санал Рязандин военный училищеда кIелай полковник Павел Чипюка, РД-дин Халкьдин Собранидин председателдин заместитель Камил Давдиева, Рутул райондин кьил Давуд Сулейманова, Ахцегь, Рутул ва Докъузпара районрин военный комиссар Рафик Мегьамедова, хуьруьн агъсакъалрин Советдин председатель Надир Акимова, хуьруьн мискIиндин имам Сабир Магьмудова ва масабуру лагьана.
Дашдемир Шерифалиев
