26-сентябрдиз Махачкъаладин патав Дагъустандин буранрин сад лагьай фестиваль кьиле фена. Мярекат РД-дин хуьруьн майишатдин ва недай суьрсетдин министерстводин куьмекдалди карчи Тажудин Мусаилова тешкилнавайди тир. “Мярекатдин сергьятра аваз виридалайни зурба бурандин конкурсни кьиле фена — сад лагьай чка кьур майвадин заланвили 265 килограмм тешкилзавай ва ам амай вири буранрилай 30 килограммдилайни гзаф залан тир”, — хабар гузва РД-дин хуьруьн майишатдин ва недай суьрсетдин министрдин заместитель Шарип Шарипова.
Мярекатда Хасавюрт, Къарабудахкент, Буйнакский, Къумтуркъала, Къизляр ва са жерге маса районрай атанвай буранар гьасилунал машгъул хуьруьн майишатдин карханайри, фермерри ва хсуси майишатрин иесийри иштиракна.
Фестивалдиз гьакIни Дагъустандин тежрибайрин станцияда (Вирироссиядин набататрин генетикадин рекьяй мумкинвилер ахтармишдай Н.В.Вавилован тIварунихъ галай институтдин филиал) ахтармишзавай сортарин буранар ва гибридар гъанвай. Гьелбетда, ина Тажудин Мусаилова вичин чилел гьасилнавай гзаф жуьре сортарин буранарни авай.
Карчиди къейд авурвал, уьлкведин гьар жуьре регионра гзаф кьадар витаминар ва микроэлементар квай майва — буран гьасилунин месэладиз кьетIен фикир гузва. Гьаниз килигна, адан кьилиз патарилай вишелай гзаф сортарин буранар ва гибридар гъидай ва вичин участокда цадай фикир атана. Абурухъ гелкъуьнин кардал ада Дагъустандин аграрный госуниверситетдин студентарни желбна. Къенин юкъуз Т.Мусаилован майишатда кьадардал, рангунал, жуьредал ва тIямдал гьалтайла, жуьреба-жуьре буранар гьасилзава. Карчидиз республикада гьасилзавай сортарин буранрин кьадар мадни гегьеншардай фикир ава.
“Буранар гьасилунин рекьяй Дагъустан уьлкведа кIвенкIвечи чкайрикай садал ала. Гьар йисуз республикада тахминан 70 агъзур тонн и майваяр гьасилзава. Абурун 90 процент агьалийрин хсуси майишатра цазвайбур я. Юкьван гьисабдалди, республикада са гектар чиляй 330 центнердилай гзаф буранар вахчузва”, — лугьузва Ш.Шарипова.
«Лезги газет»
