Мегьарамдхуьруьн районда ракъинин кагьрабаяр кIватIунин кIвалах худда кьиле физва. Къейдна кIанда хьи, вилик квай йисарин нетижайрал асаслу яз, кIватIзавай ципицIрин кьадардал гьалтайла, район республикада кIвенкIвечи чкадал ала.
Райондин кьил Фарид Агьмедова къейдзавайвал, райондин экономикада хуьруьн майишат кар алай хел я, кьетIен пай адак багъманчивили, уьзуьмчивили ва куьлуь емишар гьасилдай хиле кутазва.
Малум хьайивал, ципицIрин гатун сортар кIватIунин кIвалах акьалтIарнава. Алай вахтунда райондин майишатра ракъинин кагьрабайрин геж битмиш жедай сортарин бегьер кIватIун давам жезва.
22-сентябрдин делилралди, районда, санлай къачурла, 9605 тонн ципицIар кIватIнава, са гектардин бегьерлувал 108 центнердиз барабар я. Райондин мулкунал асул гьисабдай “Рислинг” “Ркацители” ва “Августин” сортарин ципицIар гьасилзава. РикIел хкин, районда уьзуьмлухрин умуми майдан алай йисуз 1745 гектардиз барабар я.
«Лезги газет»
