Россиядин эцигунрин министерстводи 2019-йис патал  регионра яшайишдин кIвалерин квадратный метрдин базардин юкьван къимет махсус буйругъдалди тайинарнава.

Алукьзавай йисан сифтегьан 6 варз патал квадратный метрдин къимет 43 агъзурни 360 манатдиз барабар яз тайинарнава, им лагьайтIа,  2018-йисан 2-паюна авайдалай 607 манатдин виниз тир кьадар я.

Дагъустан патал са  квадратный  метрдин юкьван къимет 29 агъзурни 955 манат яз тайинарнава. 2017-йисуз республикада и делил 27 агъзурни 110 манатдиз барабар тир.  Гьа са вахтунда, федеральный идарада къейдзавайвал,  СКФО-да юзан тийизвай эменнидин (дараматрин) къимет,  уьлкведа   виридалайни ужузбурукай сад я.

Виридалайни багьа яшайишдин кIвалер, гьелбетда, уьлкведин меркезда ава: Москвадин агьалийриз са квадратный  метр  91 агъзурни 670 манатдай акъваззава. Санкт-Петербургдин кIвалер кьвед лагьай чкадал ала – ина са квадратный   метрдин къимет 71 агъзурни 53 манатдиз барабар я.

Республикадин эцигунринни ЖКХ-дин министерстводин пресс-къуллугъди баянар гайивал,  яшайишдин кIвалерин са квадратный  метрдин къиметар яшайишдин кIвалер маса къачун патал федеральный бюджетдай субсидияр чара ийизвай   агьалийриз  гузвай куьмекдин пулунин кьадар тайинардайла ишлемишзава.

“Кьезилвилер авай агьалияр патал гьалар къулайбур хьиз аквазва.  Са квадратный  метрдин къимет виниз финихъ галаз алакъалу яз  абуруз гузвай субсидиядин кьадарни хкаж жезва,   гьакъикъатда яшайишдин кIвалерин къиметар агъуз аватун себеб яз, абурухъ кIвалер къачунин жигьетдай авай мумкинвилер артух жезва”, — малумарзава министерстводин пресс-къуллугъди.

Чи мухбир