Махачкъаладин аэропортуна международный терминал эцигунин кIвалахар алай йисан эхирдалди акьалтIарда, ишлемишиз лагьайтIа, терминал 2019-йисан эхирдиз вахкуда.
Аэропортунин пресс-къуллугъди хабар гузвайвал, и вахт алукьдалди цIийи корпусда таможнядин ва пограничный Управленидин федеральный къуллугъриз чка гуда.
“Эцигунрин кIвалахар кьилдин карчи тир инвестордин такьатрин гьисабдай тамамарзава. Терминал 2016-йисуз эцигиз башламишнай, адан диб туькIуьрунин кIвалахар кьилиз акъуднава. Санлай къачурла, терминалдин майдан 8 агъзур квадратный метрдилай алатда, анай са сятда 190 кас ахъайиз жеда. Иниз къвезвай ва инай хъфизвай пассажиррин къуллугъда сад хьиз, са вахтунда акъвазиз жеда”, — гъавурда твазва пресс-къуллугъди.
Махачкъаладин аэропорт Дагъустанда авай сад я. Уьлкведин къенепатан рейсер патал ина са сятда 200 пассажир, маса уьлквейриз физвай рейсер патал – са сятда 60 пассажир ахъайиз жезва. Алай вахтунда инай рейсер Москвадиз (йикъа 8-10 сеферда), Санкт-Петербургдиз (йикъа садра), гьакIни Сургутдиз, Дондал алай Ростовдиз, Сочидиз, Минеральный Ятариз, Краснодардиз, гьакIни Къазахстандин, Туьркиядин ва Арабрин Сад Хьанвай Эмиратрин шегьерриз тамамарзава.
2017-йисан декабрдиз хабар гайивал, йисан вахтунда аэропортунин куьмекдалди санай масаниз фейи пассажиррин кьадар, адан тарихда сифте сеферда яз, 1 миллион касдив агакьнай.
Чи мухбир
