Республикадин клиникадин больницадин (РКБ) духтурри са дагъустанвидин жигеррай операциядин куьмекдалди кьуд сухвакай ибарат тир махсус “муьгъ” ахкъудна. Идакай “Лезги газетдиз” РД-дин здравоохраненидин министерстводай хабар гана.
РКБ-диз, вичиз нефес къачуз четинзава ва уьгьуьяр акатнава лугьуз, Дербент райондин агьали атана. Адан гафаралди, са шумуд йикъан вилик ксанвай чIавуз сарарин духтурди эцигнавай сухварин махсус “муьгъ” дуьшуьшдай туькьуьнна.
Пешекарри ахтармишунар тухвайдалай кьулухъ тайин хьайивал, сухварин “муьгъ” чапла патан жигерда акIанвай. Идакди жигердиз са кьадар зиянни хьанвай. Эгер агьали вахтунда больницадиз атаначиртIа, стIалжем, жигерда ирин кIватI хьун мумкин тир.
Операциядин нетижада духтурри сухварин “муьгъ” ахкъудна. Алай вахтунда итимдин сагъламвал хъсан хьанва.
«Лезги газет»
