Зи ихтилат жуван аял вахтарин дуст, Дербент шегьерда яшамиш жезвай Азаев Мевлидин Идаятовичакай я. Идаят бубадин тIвар кьурла, ам чидай вирибуру адаз Аллагьди рагьметрай, пара къени къилихрин, инсандихъ галаз хуш рафтарвилелди рахадай кас тир лугьуда. Адан хва Азаев Мевлидин чидайбуруни вирида адаз алхишзава, пара хъсан инсан я лугьузва.
Мевлидин 1949-йисуз вини Къурушдал дидедиз хьана. Ада кьуд лагьай классдал кьван Къурушрин муьжуьд йисан школада кIелна, ахпа хизан Дербент шегьердиз куьч хьайила, ина кIелунар давамарна. Дагъустандин политехнический институтдик экечIай ада вуз 1973-йисуз яру диплом къачуналди куьтягьна, консервиярдай инженер-технологвилин пеше къачуна. Дербентдин консервийрин комбинатдиз рекье туна ва цехдин мастервиле кIвалахиз башламишна. 1980-йисуз Мевлидинакай заводдин кьилин инженер хьана. 1984-йисуз Дагъустандин консервийрин объединенидин руководстводи ам Кьасумхуьруьн консервиярдай заводдин директорвиле рекье туна. Ина са йисуз кIвалахайдалай кьулухъ Хасавюрт шегьердин консервиярдай заводдин директор хьана. И вахтунда завод са шумуд сеферда гъиляй-гъилиз къведай Яру пайдахдин, Дагконсервобъединенидин руководстводин патай грамотайрин ва пулдин пишкешрин сагьиб хьана. М.Азаев вичив рахай гьар са касдин гъавурда акьадай, дердидикай хабар кьадай инсан я, рагьметлу Идаят буба хьиз. Дербентдин консервиярдай комбинатда кьилин инженер яз кIвалахзавай вахтунда чун адан патав икI акъатнай. Чи хуьруьз Дагъустандин обкомдин 1-секретарь Юсупов атанай. Я ракь, я шифер алай са кIвални хуьре такун себеб яз ада эцигунардай материалар чара авунай. Чун са пуд кас, шиферар, тахтаяр гъиз, Белиждиз фенвай, амма абур хкидай машинар жагъизвачир. Шоферри, пара четин я Къурушдал фин лугьуз, кьил кутазвачир. Кьве югъ хьана икI. Эхирни за гадайриз зи аял вахтарин яр-дуст Азаев Мевлидинан патав Дербентдиз фин теклифна. Белки, ада чаз куьмек гун.
Чун акурвалди, ам сивел хъвер алаз къарагъна, къаршидиз атана, жузун-качузун авуна. Чун вакай са куьмек кIанз акъатнавайбур я лагьайла, ада гьасятда вуч хьанватIа лагь, куь кIвалах туькIуьриз тахьайтIа, за ина кIвалахна вучзавайди я лагьана жаваб ганай. Чна чи дердидикай лагьана. Ада комбинатдин машинривай а рекьерай физ жедач лагьана ва автоколоннадин директордиз зенг авуна. Табасаранви тир директор. Авай гьалдикай лагьайла, ада Мевлидиназ пака экуьнахъ гьа вуна лугьузвай ругуд машин чара ийида, кирини герек туш ви хатурдай, путевкаяр вири къемаз кхьена гьазурда лагьанай. ИкI чи кIвалах туькIвена. Чаз гьардаз кьве ЗИЛ машин чара авунвай . И юкъузни Мевлидина чун къунагъламишна, хутахна вичин кIвализ, экуьнахъ вичин машинда аваз автоколоннадал гъана, рекье хтуна. Чна къенин юкъузни, гаф кватайла, Мевлидиназ алхишзава, вичиз Аллагь куьмек хьурай лугьузва.
Масадан дердидикай хабар кьадай инсанар кьериз-цIаруз гьалтзавайди я. Мевлидин гьахьтинбурукай я. Заз пара инсанар чида адахъ галаз кIвалахай, амма садни адакай чIурукIа рахадач. Азаев Мевлидин, алакьунар авай пешекар хьиз, къени, гьуьрметлу хизандин кьилни я. Ада вичин уьмуьрдин юлдаш Мариятахъ галаз санал кьуд хва чIехи авуна, абурув кIелиз туна. Къе гьардахъ вичин кIвал-югъ хьанва.
Гада Азаев Фармана Дербентдин налогрин инспекцияда отделдин начальник яз кIвалахзава. Азаев Рафик Ленинградский областда сергьят хуьзвай къуллугъда контрактник я. Вагьидни Сабир карчияр я.
Алай вахтунда Азаев Мевлидин Дербент шегьерда яшамиш жезва, пенсиядиз экъечIнава, лайихлудаказ ял язава. Мевлидин хьтин намуслу, инсанвал квай, масадан дердидикай хабар кьадай вирибуруз баркалла!
Шихали Багъиров
