Россиядин Федерациядин эцигунрин министерстводи, залзала хьайитIа, чкIидай гьалда авай кIвалерин диб-бине (фундамент) мягькемарун ваъ, абур михьиз чукIурун теклифна. Идакай, министрдин заместитель Юрий Гордееван гафарал асаслу яз, СМИ-ри хабар гузва.
Кьилди къачуртIа, федеральный бюджетди, залзала хьайитIа, чукIун мумкин тир гьалда авай кIвалерин диб мягькемарунин рекьиз, государстводин программадин бинедаллаз, гьар йисуз пулдин такьатар чара ийизва. Гьакъикъатда лагьайтIа, и кар авунихъ метлеб амач. Идан чкадал залзала хьунин жигьетдай хаталу регионра мягькем фундамент авай цIийи кIвалер, дараматар, аялрин бахчаяр ва мектебар эцигзава.
Гордеева хабар гайивал, санлай къачурла, залзалади таъсир авун мумкин тир мулкарик Россиядин 27 регион акатзава. Анра чIехи пай кIвалер алатай асирдин 60-йисара ва адалайни вилик эцигнавайбур я. А чIавуз анра кIвалерин бинаяр лазим къайдада мягькемарзавачир. И дараматрин чIехи пай алай вахтунда лап куьгьне хьанва.
Идалай вилик кардик хьайи, тайин макьсаддихъ элкъуьрнавай программадин сергьятра аваз Россиядин илимрин академияди залзала хьунин жигьетдай хаталу районар ахтармишна ва бязи чкайра хаталувилин дережа кьве баллдин хкажна, къейдзава Ю.Гордеева. Яни фундамент мягькемди, дурумлуди авунин кIвалахриз гьар йисуз такьатар чара ийизватIани, абур авай гьал анжах усал жезва. Гьаниз килигна, министрдин заместителдин гафаралди, цIийи жуьредин серенжемар кьабулдай вахт алукьнава ва я шегьерар цIийи кьилелай эцигиз башламишна кIанзава.
Къейд ийин, мукьвал тир вахтунда залзалаяр хьунин жигьетдай хаталу регионрик Крым ва Севастополни кухтун мумкин я.
Чи мухбир
