Сулейман-Стальский райондин Агъа СтIалрин паласадал кIвалахар къвердавай гурлу жезва. Ина хам чилерал са шумуд гектардин багълар, уьзуьмлухар цIийи къайдада кутазва ва техилар цазва. Хам чилериз яд гунин месэла четинди ятIани, мумкинвилерикай менфят къачуна, арендаторри кIвалахар акъвазарзавач.
“Ашагастальский” совхоз чкIайдалай кьулухъ, вири хуьруьн агьалийри хьиз, Муртазаев Далгатани 5 гектар чил кирида къачуна, къуьл цаз башламишна. Сад-кьве йисуз бегьер вахчурла, харжияр чкадал хтайла, хийирни хьана.
Ачух паласада мал-къаради зиян гуз акурла, акъатзавай харжийризни килиг тавуна, Далгата 5 гектардин чил элкъуьрна симерин жагъунда туна, кIевирна.
Далгат 1954-йисуз Агъа СтIалрин хуьре лежбер Жаватан хизанда дидедиз хьана. Советрин Армиядин жергейра къуллугъайдалай кьулухъ, 1971-йисуз, ДГУ-дин физикадинни математикадин факультетдик экечIна. Кьве йисуз кIелайдалай кьулухъ анай экъечIна, Махачкъаладин политехнический техникумдик экечIна. Анаг хъсан къиметар аваз куьтягьай Далгат Белиждин консервиярдай заводдиз мастервиле кIвалахал рекье туна. Гуьгъуьнлай технолог яз кIвалахна. КIвалахдикай къерех тахьана, ам Москвада Разумовскийдин тIварунихъ галай институтдин инженерно-экономический факультетдик экечIна. 1985-1986-йисара ада Кьасумхуьруьн агропромбанкда кредитный инспектор, ахпа Тульский областдин Арсеньевский районда совхоздин кьилин инженер-экономист яз кIвалахна.
Далгат Жаватович 2001-йисуз Кьасумхуьрел политехнический колледждин экономикадин чирвилерин рекьяй муаллим хьана, ина 2009-йисалди кIвалахна.
Гуьгъуьнин йисара Муртазаев Далгата, вичин хизанни галаз хуьруьн майишатдин кIвалахрив эгечIна, техилар цаз, багълар кутаз башламишна. И кIвалахди хъсан нетижаярни гана. Сифтедай бегьер екеди хьанач. Гуьгъуьнин йисара вахтунда цан цана, миянардай шейэр вегьез хьана.
Алатай йисуз Далгата хъсан бегьер — са гектардай 50 центнердив агакьна михьи къуьл вахчуна. Ада улакь авай чкайрай виликамаз жагъурзава. Дигидай цин патахъай лагьайтIа, дарвал жезва, хуьруьн агъа кьилиз къведай къубуда, герек хьайила, вахт-вахтунда яд жезвач. Ник чIуру хъчарикай михьун, кьифери тIуьн тавун патал дарманар кутазва. Багъларин гъвечIи участокра вахтунда хилер хкатIзава. Дарманар ягъиз вири хизанди куьмекар гузва.
Далгат Жаватовича 1974-йисуз цицIигъви Сейдуллагьан руш Салигьатахъ галаз сир сад авуна. Салигьата адаз 3 хвани 3 руш багъишна. Вирида гьар жуьредин чирвилер къачуна.
2009-йисуз пенсиядиз фейи Далгат Муртазаев хуьре кьиле физвай вири кIвалахрин иштиракчи я. Адаз хуьруьнвийрин арада гьуьрмет ава.
Вадим Жамалдинов
