Кьунвай майданрал, тIебиатдин шартIарал гьалтайла, Сулейман-Стальский район хуьруьн майишатдин муниципалитетрик акатзава. Агропромышленный комплексда 27 кархана, 3 СПК, лежбервилинни фермервилин 47 майишат, 20942 хсуси куьмекчи майишатар кардик хьуни ва и хиле 960 арендаторди кIвалахуни и кардин патахъай шагьидвалзава.
Райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова чаз лагьайвал, карханайри, лежбервилин майишатри гзаф майданра асул гьисабдай ичер, ципицIар, салан майваяр (теплицайрин майишатра) битмишарзава. КФХ-ри, ЛПХ-ри ва агьалийри чпин кIвалерихъ галай усадьбайра хутар, пIинияр, чуьхверар, шефтелар, машмашар, жумар ва маса няметарни гьасилзава.
— Чи ерияр, иллаки Кьасумхуьруьн, Вини СтIалрин, Курхуьруьн, Кьулан СтIалрин, Алкьвадрин, Агъа СтIалрин, Герейханован хуьруьн, Сийидрин мулкар пIинияр гьасилуниз кутугай чкаяр я, — лугьузва Гь.Абдулкъафарова. — Райондин маса хуьрерани агьалийри хизандин игьтияжар патал пIинияр гьасилиз гзаф йисар я. ПIинийрин 1-5 гектар багълар кутунвай лежбервилин майишатарни ава. ПIинияр райондин шартIара менфятлу тирди фикирда кьуналди, эхиримжи йисара хуьруьн майишатдин карханайрини, инвестицийрин проектар уьмуьрдиз кечирмишуналди, пIинийрин багълар кутазва. Ида инанмишвал гузва хьи, районда пIинийрин багъларин майданар йисалай-суз артух жеда. Ида инсанриз кIвалахдин алава чкаяр арадал гъида.
Гьамидин Абдулкъафаровахъ галаз чун пIинияр гьасилунал машгъул тир лежбервилин ва хсуси куьмекчивилин са шумуд майишатдизни фена. Чаз акурвал, багълара, кьилдин ксарин усадьбайра пIинийрин тарифдин бегьер агакьнава. Гад бегьерлуди яз атуни хуьрерин зегьметчиярни шадарзава. Абуру атIай пIинияр чпин игьтияжриз ишлемишзава, гьакIни муьштерийриз маса гузва. Дадлу пIинийриз муьштерийрин патай игьтияж ава.
Хазран Кьасумов
