Рамазан Нагъиеван – 95 йис
Вичиз гьахълудаказ «Шииратдин Мекке» лугьузвай Агъа СтIалрин хуьряй машгьур шаирар гзаф акъатна: Дагъустандин халкьдин шаирар — СтIал Сулейман, Сажидин Саидгьасанов, Фейзудин Нагъиев, шаир-фронтовик Балакъардаш Султанов, СтIал Мусаиб, СтIал Саяд… Абурун арада шаир ва драматург Рамазан Нагъиевани тайин чка кьазва.
Р.Нагъиев 1928-йисан майдиз Агъа СтIалдал Мегьамедшафи ва Мафисат Нагъиеврин хизанда дидедиз хьана. Школа акьалтIарай ада, кIвалахни ийиз, СтIал Сулейманан тIварунихъ галай институтдин (гилан ДГУ) тарихдин факультетда заочнидаказ кIелна. Адалай гуьгъуьниз Рамазан Нагъиева Цмуррин, Хутаргърин, НуьцIуьгърин, Агъа СтIалрин школайра тарихдин муаллим, завуч, директор яз кIвалахна. Вири вахтара ам шиирар, пьесаяр, гьикаяяр кхьинал, халкьдин фольклор кIватI хъувунал машгъул хьана. СтIал Сулейманан ва СтIал Саядан ирс кIватIуникни ада еке пай кутуна, абурун са кьадар цIийи шиирар жагъур хъувуна. Рамазан Нагъиева жагъурай са жерге шиирар ва адакай кхьей макъалаяр газетризни акъатнай. Р. Нагъиев 1992-йисуз сифте яз чапдай акъатай СтIал Саядан шииррин ктаб туькIуьрайди ва сифте гаф кхьейди я.
Рамазан Нагъиев Куьре пата шаир яз машгьур хьана. Адан шиирар райондин ва республикадин газетриз, журналриз акъатна, радиодай гана, бязи шиирар манийриз элкъвена. Р. Нагъиев 1960-йисара кхьей «Саядпери» драмадин ва «Яру пайдах патал» пьесадин авторни я. 2006-йисуз Рамазан Нагъиеван «Ачух суфра» тIвар алаз шииррин кIватIал чапдай акъатна.
«Эгер вуна бегьерлу багъ кутуртIа, адан бегьер вири халкьдин девлет я. Ватан патал гьикьван зегьмет чIугуртIа, Ви уьмуьрдин куьтягь тежер къимет я», — цIарар кхьей шаир ва драматург Рамазан Мегьамедшафиевич Нагъиев 2009-йисан 3-июлдиз 81 йисан яшда аваз рагьметдиз фена. Эдебиятдин бегьерлу багъ кутур Рамазан Нагъиеван кар — яратмишунрин рехъ адан гада, Дагъустандин халкьдин шаир, филологиядин илимрин доктор Фейзудин Нагъиева давамарзава.
Эхь, шииратдин вацIуз акъвазун хас туш, Нагъиеврин шииратдин вацIуни виликди еримишзава.
Хазран Кьасумов
