И мукьвара Ахцегьа, райондин библиотекадин залда, Дагъустандин халкьдин шаир ва общественный деятель Фазу Алиевадин 90 йисан юбилейдиз талукь яз адан яратмишунар хуралай кIелдайбурун конкурсдин кьвед лагьай, яни райондин дережадин пай кьиле фена. Адан хкягъунин пай гьеле 15-апрелдиз чкайрал школайрани библиотекайра хьанай. Шииратдин “Ислягьвилинни кIанивилин ван” тIвар алай и мярекат Ахцегь муниципалитетдин культурадин управлениди (МКУ “УКСМПиТ”) кьиле тухвана.
Мярекат, сифте гаф рахуналди библиотекайрин къурулушдин рекьяй МКУ-дин начальникдин заместитель Аделя Агъаевади ачухна. Ахпа жюридин член, Ахцегьрин 1-нумрадин юкьван школадин муаллим, шаир Жамиля Саидовади, аялриз чешне къалурун яз, устадвилелди вичин “Дагъларин чил” шиир кIелна.
Конкурсда райондин вири школайрай 30-далай артух аялри иштиракна. Чпин муаллимарни галаз атанвай абуру Фазу Алиевадин урус чIалал кхьенвай ва авар чIалай таржума авунвай яратмишунар кIелна. Абурун алакьунар конкурсдин жюриди (адак МКУ-дин начальник Къизтер Гъаниева, адан заместитель ва райадминистрациядин патай векил Сулейман Сулейманов, и цIарарин автор, Ахцегьрин 1-нумрадин юкьван школадин муаллим, шаир Жамиля Саидова квай) тайинарна. Иштиракчийрин алакьунриз абуру къешенгдиз, таъсирдай тегьерда кIелунин номинацийрай къимет гана.
Конкурсдин нетижайрай жюриди шаирдин шиирар лап хъсандиз кIелай аялар тайинарна. Абурун жергедай чавай Раида Велихановадин, Мария Таировадин, Наиля Зугьрабовадин, Самир Дадашеван,Фатима Дадашевадин,Телли Гьажиевадин, Лейла Сулеймановадин,Самира Абдулкеримовадин, Камила Магафуровадин, Мадина Керимовадин, Селимат Рагьимовадин, Гуьзел Агьмедовадин тIварар кьаз жеда. Конкурсдин гъалибчиярни призёрар ва иштиракчияр талукь тир дережадин лишанралдини грамотайралди къейдна.
— Дагъустан Республика бажарагълу шаирралдини писателралди машгьур я. Абурукай сад дидедиз хьайидалай инихъ 90 йис хьанвай Фазу Алиева я. Республикадин шаирар рикIел хкунин, абурун яратмишунрихъ галаз танишарунин, аялар литературадин рекьел желбунин мурад-метлебдалди тухузвай и мярекатда райондин саки вири хуьрерин школайрай аялри иштиракуни чак шадвал кутазва. Литературадин яратмишунин бажарагъ ачухзава ихьтин мярекатри, — къейдна эхирдай Ахцегь муниципалитетдин культурадин управленидин начальник Къизтер Гъаниевади.
Дашдемир Шерифалиев