Генрих Гьасанов 1910-йисуз Дербент шегьерда къуллугъчидин хизанда дидедиз хьана. Адан буба Алимирзе (Али) — алкьвадарви, диде Елена Владимировна Бек немс дишегьли тир. 1927-йисуз мектеб акьалтIарай жегьил М.В. Фрунзедин тIварунихъ галай гьуьлуьн кьилин училищедиз гьахьна. 1929-йисуз, начагъвилихъ галаз алакъалу яз, Генрих хайи ватандиз хтана, ам Дагрыбтрестдин челегар расдай заводда слесарвиле акъвазна.
Сагъламвал гьалдиз хтайла, Генрих Гьасанов 1930-йисуз Азербайжандин нафтIадин институтдиз гьахьна. 1931-йисуз анай Ленинграддин гимияр расдай институтдиз хъфена. Лап хъсан къиметралди вуз акьалтIарай пешекар Балтикадин С. Орджоникидзедин тIварунихъ галай гимияр туькIуьрдай заводдиз конструкторрин центральный бюродиз (ЦКБ-диз) кIвалахал рекье твазва.
1938-йисуз Генрих Алиевича гимийрин бугъ гудай котелрин проектар туькIуьрзавайбурун дестедиз регьбервал гана. Дяведин йисара ада 17-нумрадин ЦКБ-да кIвалах давамарна. Генрих Гьасанов дяведин гимияр туькIуьрунин кардал машгъул хьана. 1942-йисуз Г.А. Гьасанован зегьмет Сталинан премия гуналди къейдна. ЦIийи техникадин гужлу чешнеяр яратмишунай Ватандин ЧIехи дяведин йисара бажарагълу конструктордиз кьве сеферда Зегьметдин Яру Пайдах орден гана.
1946-йисуз Генрих Алиевичакай Балтикадин заводдин конструкторрин бюродин кьилин конструктор ва начальник хьана. Адан регьбервилик кваз алатай асирдин 50-йисара гимийра бугъ гудай цIийи котелрин са жерге цIийи чешнеяр арадал гъунин бажарагъ, еке пешекарвал, устадвал фикирда кьуна, 1958-йисуз адаз Ленинан премия гана.
Генрих Гьасанова цин кIаникай фидай гимийрин атомный реакторар, абурун акьалтIай цIийи чешнеярни арадал гъана. 1970-йисуз Г.А. Гьасанован зегьмет Социализмдин Зегьметдин Игит лагьай чIехи тIвар гуналди къейдна. 1959-йисуз Генрих Алиевичакай Ленинграддин гимияр расдай институтдин доцент хьана, 1966-йисалай — техникадин илимрин доктор, гимийрин реакторар туькIуьрдай кафедрадин профессор. Советрин гьукуматдин дяведин ва оборонадин къудратлувал мягькемарунин карда Генрих Алиевичан зегьметар лап зурбабур хьана. Абурун чешнейрихъ къенин юкъузни къимет эцигиз тежедай хьтин еке метлеб ава. Баркаллу лезги хва 1973-йисан 28-мартдиз Ленинградда рагьметдиз фена. Ам гьана кучукна. Рагьмет хьурай вичиз.
Са тIимил алаваяр:
Конструктор Генрих Алиевич ва адан стха, композитор, Дагъустандин музыкадин бине эцигай Готфрид Алиевич Гьасановар СтIал Сулейманан райондин Алкьвадар хуьряй акъатнавай баркаллу тухумдин векил, машгьур тарихчи ва философ, «Асари-Дагъустан» ктабдин автордин Алкьвадар Гьасан-Эфендидин хтулар жезва. Дидедин патай, адан имидин хва Александр Бек бажарагълу чIалан устад, писатель тир, Ватандин тарихдин ва адан меденият артмиш авунин рекье хьайи ксар…
Шагьбала Шагьбалаев
