Кьурагь районда, физкультурникрин йикъан сергьятра аваз, хуьруьн стадиондал «Кьурагьрин 8-къугъунар» кьиле тухвана. Идакай чаз райадминистрациядин пресс-къуллугъди хабар гана. Кьиблепатан Дагъустандай, кьилди къачуртIа, Ахцегь, Докъузпара, Мегьарамдхуьруьн, Кьурагь, Хив, СтIал Сулейманан районрай, Белиж поселокдай, Дербент шегьердай, тир жаванрин арада спортдин милли жуьрейрай (абурукай 5 кьилдин ксарин арада ва садни — командайрин) кьиле тухузвай и акъажунра алай йисуз 160-далай виниз ксари иштиракна. Адан иштиракчийри ва мугьманри Кьиблепатан Дагъустанда чпихъ тешпигь авачир и акъажунар вини дережеда аваз кьиле фейиди къейдна.

Къизгъиндаказ кьиле фейи акъажунра­ агъадихъ галай ксар гъалиб хьана: Жамал Саркаров (яргъал мензилдиз чукурунай, Докъузпара район), Рамиз Рамазанов (къван яргъаз гадарунай, Кьурагь), Заур Абдурагьманов (къаткана, штанга хкажунай, СтIал Сулейма­нан район), Мегьамедтагьир Батманов (турникдал чене акъудунай, Кьурагь), Алиасгьаб Рагьманов (чIемерукрай лишанар ягъунай, Мегьарамдхуьр). Ка­нат ялунай командайрин­ арада кьиле фейи акъажунра Кьурагь райондин команда гъалиб хьана. Адаз гуьрчег Кубок гана. Путарин спорт машгьурунин макьсаддалди и жуьредайни акъа­жунар тешкилнавай. ИкI, 30 кг-дин пут хкажунай Эдик Агьмедов (СтIал Сулейманан район) гъалиб хьана.

Акъажунрин вири гъалибчияр медалар, грамотаяр, пулдин ва спортдин пишкешар гуналди къейдна. Акъажунар кьиле тухузвай чкадал адан иштиракчияр ва мугьманар патал аш ва чай гьа­зурнавай. И югъ халис сувариндаз эл­къвена.

Рагнеда Рамалданова