Дербент шегьерда виликан детдомдин чкадал бажарагъ авай аялар патал алай аямдин истемишунрихъ галаз кьадай цIийи жуьредин школа тешкилун фикирдиз къачунва. Идан гьакъиндай шегьердин администрациядин пресс-къуллугъди хабар гана.
“3-сентябрдиз Дербент шегьердин кьил Хизри Абакаров ва мергьяматлувилин “Иман” фондунин кьил Фируза Керимова Дербентдин виликан детдомдин дарамат алаз хьайи, саки 3 агъзур квадратный метрдин майдан кьунвай мулкуниз килигна. Виликан детдомдин чкадал бажарагълу аялар патал инновационный школа пайда жеда”, лугьузва малуматда.
Къейдзавайвал, са шумуд йисуз кардик квачиз хьайи дарамат, санлай къачурла, са акьван пис гьалда авач. “2017-йисуз детдомда 15 касди тербия къачузвай, абур Избербашдин детдомдиз хутахна. Алай вахтунда виликан детдомдин дараматда хизанар туькIуьруниз куьмекдай республикадин центр бинеламиш хьанва. Буш хьанвай дараматда 14 касди кIвалахзава. Идалайни гъейри, вацран къене абурун патав куьмек кIанз къвезвайди анжах са вад кас кьван я”, — баян гана администрациядай.
Ф.Керимовадин гафаралди, Дербентда аялриз чпин бажарагъ ачухардай мумкинвал гудай махсус центраяр авач. Ина бажарагълу аялар патал чешнелу школа тешкилунин, абуруз ерилу, гзаф терефрин чирвилер къачудай мумкинвал гузвай макан арадал гъунин месэла веревирдзава. Гележегда ахьтин аялриз вузра чирвилер къачунин ва кIвалахал акъвазунин месэлайрай куьмек гуда.
«Лезги газет»
