Эхиримжи вахтара Лезгийрин госмуздрамтеатрда чпин кIвалахдал ча­лиш­мишвалзавай бажарагълу жегьилри кIвалахзава. Абурукай сад Руслан Пирвердиев я. Ада театрда кIвала­хиз цIуд йис жезва. Аниз атай гьа сифте йикъарилай гатIунна, ада тамашачийрин ва коллективдин арада еке гьуьрмет къазанмишна, вич алакьунар авай актёр, хъсан вокалист, лезги манияр тамамардай устад яз машгьурна. Театрдин кьилин режиссёр, халкьдин артист Мирзабег Мирзабегова адан кIвалахдиз ихьтин къимет гузва: “Жуван яргъалди тир актёрвилин ва режиссёрвилин уьмуьрда заз театрдин гзаф несилрихъ галаз кIвалахдай мумкинвал хьана. Абурун арада хъсан вокалистарни авай. Гзаф дуьшуьшра хъсан вокалистрикай драмтеатрдин хъсан актёрар жезвач. Аллагьди инсандиз гьамиша вири патарихъай сад хьтин алакьунар, бажарагъ гузвач. Руслан Пирвердиев — им кьетIен дуьшуьш я. Аллагьди адаз вокалиствилин ва драмтеатрдин актёрвилин пай ганва. Виниз тир пешекарвили, датIана яратмишунрин рекье хьуни ам амайбурулай тафаватлу ийизва”.

Уьмуьрдин рехъ

Руслан Пирвердиев 1974-йисан 20-июндиз Хачмаз райондин Ялама станциядал яшамиш жезвай Бульфаран хизанда дидедиз хьана. ГъвечIи чIавалай музыкадал ашукь Руслан Яламада 1-классдиз ва музшколадиз фена. И йисара ада гьар жуьредин конкурсрани проектра иштиракзавай. Гада ругуд лагьай классда авайла, хизан Бакудиз куьч хьана. Ина юкьван мектеб акьалтIарна, Азербайжандин архитектурадин ва эцигунрин госуниверситетдиз гьахьна. Музыкадин хиле вичин алакьунар ахтармишдай, бажарагъдал кIвалахдай ашкъи авай жегьил университет акьалтIа­райдалай кьулухъ Азербайжандин консерваториядин патав гвай школа-студиядин вокалдин отделенидик экечIна.

1995-йисалай чIехи сегьнейриз экъечI­завай Руслан гьар жуьредин дережайрин концертринни фестивалрин иштиракчи я. 1996-йисуз адакай маш­гьур­ шаир Седакъет Керимовади тешкилай лезги халкьдин “Сувар” ансамблдин солист хьана.

2006-йисуз Дагъустандиз куьч хьайи Р.Пирвердиева вичин алакьунар му­зыкадин гзаф проектрани мергьямат­лувилин концертра къалурна. Гуьгъуьн­лай Да­гъустан Республикадин жегьилрин крарин рекьяй комитетдин тек­лифдалди ада республикадин ва ше­гьер­дин конкурсра жюридин член яз иштиракна.

2008-йисуз Руслан Пирвердиеваз Дагъустандин операдин ва балетдин гостеатрдиз кIвалахиз теклифна. Са йисалай Руслана къадим Дербентда кIвал-югъ кутуна ва Лезгийрин госмуздрамтеатрда кIвалахиз эгечIна.

Яратмишунар 

Лезги театрда Руслан Пирвердиев сифте Уь.Гьажибегован “Аршин мал алан” опереттада Аскеран ролда къугъвана. ТIебиатди вичиз ганвай кьетIен пай ва пешекарвал себеб яз и роль Руслана­ тарифдавайвал тамамарна, адан бажарагълувал тамашачийрини кьатIана. Гьа икI актёрди сад-садан гуьгъуьналлаз жуьреба-жуьре ролар тамамарна: чубан Къадиман (Хуьруьг Тагьиранни Къ.Межидован “Ашукь Саид”), савдагар Сулейманан (А. Абдулгъафурован “Находчивый Алмас”), Сакасан (Ф.Беделован “Манекены”), Билалан (А.Исмаилован “Пуд югъ”), Етим Эминан (“Мамнунан чирагъ”), Гьажидин (С.Рамазанован “Айисат”) ва мсб.

Лезги театрда кIвалахиз башламишай сифте йикъарилай Р. Пирвердиева вич яратмишунардай, гьамиша цIийиви­лерин гуьгъуьна авай кьетIен актёр тирди къалурна. Сегьнеда устадвал хкажунални ам датIана алахънава. Актёрди сегьнеда къалурзавай къаматриз хъсан акунар, кесерлувал ва къенепатан гужлу гьиссер хас я. И кар ам Аскеран, Эфен­ди Капиеван, чубан Къадиман, сав­дагар Сулейманан, Сакасан, Билалан, Етим Эминан, Алиханан, силисчидин ва маса ролра къугъвай тегьерди субутзава. И къаматра Руслан Пирвердиев къугъвазвай тегьердиз “Лезги газетдин”, “Дагъустандин жегьилар”, “Да­гъустандин правда”, “Дербентдин цIийи­вилер”, “Дербентдин хабарар” газетрин чинрилай критикри хъсан къимет гана, тамашачийри гурлу капар яна.

Руслан Пирвердиеван бажарагълувал ва алахъунар эхиримжи йисара къугъ­вазвай ролрай мадни хъсандиз ак­вазва. Гьар са ролдив ам рикI гваз, халис­ пешекар хьиз эгечIзава. Жегьил пешекардин бажарагъди цуьк акъудунин карда М.Мирзебегован, чIехи несилдин веки­лар — актёрар, Россиядин лайихлу ар­тис­тар тир: А.Магьсудован, А.Гьабибован, Да­гъус­тандин халкьдин артистар Э.Багъишеван, Ш.Закарьяеван, И.Рамазанован, М.Мамедован ва масабурун чалишмишвилери еке роль къугъвана. Абур жегьил актёрдин меслятчияр, наси­гьатчияр хьана­.

Актёр Р.Пирвердиеваз зегьметдал рикI, искусстводал ашукь хьун хас я. Гьар гьи ролда къугъваз хьайитIани, ада абурук, лугьудайвал, вичин руьгьдин кIус ку­тазва. Нетижада кьетIен жуьредин акьал­тIай къаматарни арадал къвезва.

Манидардикай хьиз рахун хьайитIа, Руслана лезгийрин гзаф манийриз цIийи уьмуьр хганва ва халкьдин арада мадни сейли хьанва. Манияр ада урус, азербайжан, туьрк чIаларални тамамарзава.

Пешекар актёр ва манидар яз, ада республикадин культурадинни общественный уьмуьрдани иштиракзава. Кьиблепатан Дагъустанда ам галачиз кьиле физвай мярекатар бажагьат ава. Театрдин искусстводик еке пай кутунай ва яратмишунрин рекье аваз 20 йис тамам хьунихъ галаз алакъалу яз Руслан Пирвердиеваз и мукьвара “Дагъустан Республикадин лайихлу артист” лагьай гьуьрметдин тIвар ганва.

Тамашачийрин, кIвалахдин юлдашрин мурад Русланахъ мадни еке агалкьунар хьун я.

* * *

20-октябрдиз Дербентда СтIал Сулейманан тIварунихъ галай Лезгийрин госмуздрамтеатрдин залда Руслан Пирвердиеван концерт кьиле фена!

Азиз Мирзебегов