СтIал Сулейманан райондин Вини СтIалрин мектебда физикадай Россиядин физикадинни математикадин илимрин доктор Заур Алисултанован тIварунихъ галай районрин уртах III олимпиада кьиле фена.
Мярекат мергьяматлувилин «Иман» фондунин куьмекдалди СтIал Сулейманан райондин администрацияди тешкилнавайди тир.
Кьве категорияда аваз кьиле фейи олимпиадади СтIал Сулейманан, Хив, Ахцегь, Кьурагь районрин умуми образованидин идарайрин 10-11-классра кIелзавай аялар кIватIна. Адан тешкиллувилин комитетдик ва экспертринни методикадин комиссиядик физикадинни математикадин илимрин доктор Заур Алисултанов, ДГУ-дин физикадин факультетдин чирвилерин рекьяй декандин заместитель, Бажарагълу аялрин центрадин директор, физикадинни математикадин илимрин кандидат Гьажимирзе Рагьимханов ва РД-дин «РФМЛИ» ГБОУ-дин физикадин муаллим Мегьамедшафи Хизриев квай.
СтIал Сулейманан райондин кьил Саид Темирханован патай мугьманриз саламдин келимаяр лугьуналди образованидин управленидин начальник Гьуьсейн Шихбабаева мергьяматлувилин «Иман» фондуниз, Ханбалаеврин хизандиз, фонд арадал гъайи Фируза Керимовадиз баркалладин гафар лагьана.
Хуш келимайралди кIватI хьанвайбур Заур Алисултановани, райондин собранидин депутат Мурад Ханбалаевани тебрикна.
Олимпиададин иштиракчийриз, образованидин программадин бинедаллаз, Заур Алисултанова гьазурнавай тапшуругъар гана. 3 сятда тамамарай абурун нетижаярни комиссиядин председатель хьайи Заур Алисултанова кьуна.
ИкI, 10-классра кIелзавай аялрин арада 1-чка — Жаруллагь Шамсудинова (СтIал Сулейманан райондин ЦIийи хуьруьн СОШ), кьвед лагьай чка — Исмаил Шуаева (Ахцегьрин 1-нумрадин СОШ) ва пуд лагьай чка Лерман Ражабова (СтIал Сулейманан райондин Цмуррин хуьр) кьуна.
11-классра кIелзавай аялрин арада 1-чка — Муслим Къафланова (РД-дин «Республикадин бажарагълу аялар патал многопрофильный лицей-интернат» ГБОУ, 7-классдалди Кьулан СтIалрин СОШ-да кIелна), кьвед лагьай чка — Расул Гьуьсейнова (Хив райондин Хивдин СОШ) ва пуд лагьай чка Ислам Шайдаева (СтIал Сулейманан райондин Курхуьруьн СОШ) кьуна.
Гъалибчийриз, пишкешдин чкаяр къазанмишайбуруз ва муаллимриз дипломар ва «Иман» фондунин патай пулдин пишкешар гана.
Амина Муслимова
