И йикъара чаз малум хьайивал, жемиятдин «Хайи Дагъустан» гьерекатди ва региондин «Халкьдин фикир» фондуни гзаф миллетрикай ибарат Дагъустандин халкьдин вилик лайихлувилерай вичин ери-бине Дербент шегьердай тир Эмирханов Фаргьад Аскеровичаз «Дагъустандин халкьдин игит» лагьай тIварцIин лишан тир «Къизилдин гъед» ганва.
Фаргьад Эмирхановакай чна гьеле 2022-йисуз мобилизациядин серенжем кьиле физвай вахтунда газетда чапнай - а чIавуз Мегьарамдхуьруьн райондин Азадогъли хуьруьн администрациядин кьилин везифаяр тамамарзавай Ф. Эмирханова, амай жегьилриз чешне яз, дяведин махсус серенжем кьиле физвай мулкариз гуьгьуьллудаказ фидай къарар кьабулнай. 2023-йисан июлдиз СВО-дин женгера къалурай кьегьалвилерай адаз «Жуьрэтлувиляй» II дережадин медаль гана. Са йисалай гзаф вахт алатайла, женгера хирер хьайи чи ватанэгьли фронтдай хкведайвал хьана.
Амма ада и рекье къуллугъ авун акъвазарнач. ИкI, сагъламвал хъсанарунин тамам курс акьалтIарайдалай кьулухъ Фаргьад Эмирханова женгер кьиле физвай мулкара авай вичин юлдашриз, гьакIни амай аскерриз мергьяматлувилин куьмек гунин кардал машгъул хьун кьетIна. Ихьтин фикирдал алай ада маса ксарин куьмекни галаз кIватIнавай еке игьтияж авай шейэр — квадрокоптерар, тепловизорар, хсуси михьивал хуьн патал лазим жезвай такьатар — вичин хсуси машиндаваз тухвана ва и рекье кIвалах давамарзава.
«Дяведин махсус серенжемда иштиракзавай вири гадайриз за сагъ-саламатдиз чпин хизанрин, багърийрин патав хтун алхишзава. Абурукай гьар сад гьуьрметдиз лайихлу игит я», — лугьузва халкьдин вилик къагьриманвал тестикьарнавай Фаргьада.
Cаида Мурадова
