Образованидин хиле лайихлувилерай Сулейман-Стальский райондин Агъа СтIал- Къазмайрин юкьван школадин муаллим Фатагьова Эльмира Загьировна мукьвара хурудал алкIурдай “Россиядин Федерациядин тербиядин ва просвещенидин лайихлу работник” лишандиз лайихлу хьана. Шабагьни адав шад гьалара муниципальный райондин кьил Нариман Абдулмуталибова вахкана (шикилда). Мукьвара чун Э.Фатагьовадихъ галаз гуьруьшмиш хьана.
Гьуьрметлу пеше
Пешеяр гзаф я. Абурукай гьи пеше хъсанди я лагьана хабар кьуртIа, гьарда садан тIвар кьада. Эльмира Загьировнадиз и суал гайила, жаваб гуьзлемишзавайди хьана: муаллимвал!
— Муаллимвилин пешедал зи рикI гьеле школада кIелзавай йисарилай алай, — чина хъвер аваз лугьузва ада. — Аялриз чирвилерни тербия гунилай, абур чIехи уьмуьрдиз гьазурунилай баркаллу мад вуч кIвалах ава кьван?! Жув и кардал машгъул хьунал за разивал ийизва.
Эльмира Загьировнадин гафарал чазни алава хъийиз кIанзава: гьакъикъатдани, муаллимвилин пеше вири девирра обществода гьуьрметлубурукай сад хьайиди я, къени гьакI я ва гьамиша гьакI амукьни ийида.
“Муаллим, вич куз, масадаз ишигъ гузвай шем я” гафар кхьей XIX асирда яшамиш хьайи Италиядин писатель Джованни Руффинини агъзур сеферда гьахъ я лугьуз жеда.
Кьилиз акъатай мурад
Эльмира Фатагьова 1972-йисан 21-июлдиз Агъа СтIал-Къазмайрал чпиз хуьре-кIвале, районда еке гьуьрмет-хатур авай инсанар тир Загьир ва Ламунат Гьажимирзоеврин хизанда дидедиз хьана. ГъвечIи чIавалай рикIе авай мурад кьилиз акъудун патал Эльмира В.И.Ленинан тIварунихъ галай Дагъустандин государственный университетдин филологиядин факультетдик экечIна. Студент тир йисарани кIелунин, ахлакьдин, университетдин общественный уьмуьрда активвилелди иштиракунин рекьерайни Эльмира Загьировна чешне тир. Университет лап хъсан къиметар аваз акьалтIарай 1995-йисалай инихъ ада хайи хуьруьн юкьван школада муаллимвиле кIвалахзава. Кьилин пешекарвилин дережа авай муаллимди кIелзавайбуруз урус чIаланни литературадин ва лезги чIаланни литературадин тарсар гузва. Дагъвийрин аялриз чIехи урус ва къадимлу лезги халкьарин чIалар ва зурба литература чирунин карда Эльмира Загьировнади вичин тарсара чIал гегьеншардай цIийи къайдаяр, жуьреба-жуьре таблицаяр, аквадай агитациядин такьатар, дидактикадин девлетлу материалар, художественный литература ишлемишзава. Идалайни гъейри, ада зайиф аялрихъ галаз алава тарсар тухузва, аялрин диде-бубайрихъ галаз гьар йикъан алакъа хуьзва.
— Аялрихъ дерин чирвилер хьунин 90 процент муаллимрин зегьметдилай, анжах 10 процент аялрин бажарагъдилай аслу я, — лугьузва Эльмира Загьировнади.
ЧIехи шабагь
Бубайрин мисалда лугьуда хьи, багъманчидиз адан зегьметди арадал гъайи бегьердиз килигна къимет гуда. Муаллимдин зегьметдин “бегьер”, гьелбетда, ада чирвилер гайи, чпикай гележегда обществодиз хийир гудай муаллимар, духтурар, инженерар ва маса пешейрин иесияр хьайи ксар, гьакIни олимпиадайра кIвенкIвечи чкаяр кьазвай школьникар я. Ихьтин “бегьерарни” Э.Фатагьовадихъ гзаф ава. Идан гьакъиндай тежрибалу муаллимдиз ганвай грамотайри ачухдиз шагьидвал ийизва:
Республикадин милли региондин паюна гъалибчи гьазурунай и ва республикадин школьникрин олимпиадада литературадай гъалибчи гьазурунай ДР-дин образованидин министр Ш.Шахован къул алай грамота ва чухсагъулдин чар;
РФ-дин образованидин министрдин заместитель Н.В. Третьякан къул алай грамота;
Сулейман-Стальский райондин администрациядин Кьилин Гьуьрметдин грамота;
инсанрин ихтияррин рекьяй тамам ихтиярар ганвай векил У.Омаровадин патай чухсагъулдин чар…
Уьмуьрда вичин пеше дуьз хкягъиз тахьай кас виридалайни бахтсуз кас я лагьанай Карл Маркса. Винидихъ къалурнавай шабагьри тестикьарзава хьи, Эльмира Загьировнади вичин пеше дуьз хкяна, гьавиляй ам бахтлу касни я.
— Жува чирвилер ва тербия гайи аялрикай Ватандиз, халкьдиз, обществодиз бакара къведай, вафалу инсанар хкатун — им зун патал виридалайни чIехи шабагь я, — лугьузва ада.
Алхишриз лайихлуди
— Эльмира Загьировна гьам урус, гьам лезги чIаларай райондин лап хъсан муаллимрин жергеда ава, — лугьузва райондин образованидин управленидин начальник Гьуьсейн Шихбабаева. — Вичиз муаллимвилин пай Аллагьди ганвай ада райондин общественный уьмуьрда активвилелди иштиракзава, ам муаллимрин конференцийрал, семинаррал рахазва, вичин тежрибадикай, педагогикадин кIвенкIвечи къайдайрикай суьгьбетар ийизва. Чун адан кIвалахдилай рази я.
— Гьакъикъатдани, Эльмира муаллим чи школадин дамах ва даях я, — лугьузва Агъа СтIал-Къазмайрин юкьван школадин директор Вадим Аскерова. — Вичи хкянавай пешедал рикI хьунилай гъейри, милайимвал, къайгъударвал, масадан куьмекдиз атун, неинки вичин, гьакI масабурун агалкьунрални дамах авун, акьалтзавай несилдик инсанвилин, ватанпересвилин гьиссер кутун, жегьил муаллимриз кIвалахда куьмекар гун — ибур Эльмира Загьировнадиз хас лишанар я. Гьавиляй адаз муаллимрин ва кIелзавайбурун патай лайихлу гьуьрметни ава.
Мегьрибан дидени я
КIвалахда агалкьунар къазанмишзавай муаллим, хъсан тешкилатчи, къайда кIандай тербиячи хьиз, Эльмира Загьировна кIвалин къул хуьзвай кайвани, мегьрибан дидени я. “Касумкентсервис” ООО-дин директорвиле кIвалахзавай вичин уьмуьрдин юлдаш Гъалиб Играмудиновичахъ галаз ада ахлакь-низам авай 3 велед хана, хвена, тербияламишна. Абурун чIехи руш Дианади хъсан къиметар аваз Дагъустандин медицинадин академия акьалтIарна, алай вахтунда Москвада духтур-эндокринолог яз кIвалахзава. Гада Рашида Краснодардин университетда юриствилин рекьяй, гъвечIи руш Фатимади Дагъустандин медицинадин университетда кIелзава.
Ашкъидивди кIвалахал физвай ва шадвилелди кIвализ хквезвай инсан бахтлу кас я, — кхьенай Туьркиядин шаир Надым Хикмета. Тамам 25 йисан къене кIвалинни школадин рехъ шадвилелди атIузвай Эльмира Загьировнадиз и гафар хас я.
Хазран Кьасумов
