Эхиримжи са шумуд йисуз мергьяматлувилин “Инсан” фондуни Рамазандин пак вацра Махачкъаладин жуьмя мискIиндин гьаятда ачухун адетдиз элкъвенвай Рамазандин алачухди цIи кIвалахдач.
Себеб лагьайтIа, алай вахтунда республикада, гьакI вири дуьньядани арадал атанвай гьаларихъ, инсаният патал вичикай еке къурхулувал авай, садакай масадак акатдай коронавирусдин тIугъвалдихъ галаз алакъалу я. РД-дин гьукумдин органрин меслятрал амал авун, яни гзаф кьадар инсанар санал кIватI хьуниз рехъ тагун яз, Рамазандин алачухар фондунин вири филиалрани агалда. Амма и пак вацра Махачкъалада ва гьакIни Дагъустандин вири районра сив хкудун патал аш ва маса суьрсетар волонтёрри кIвалериз тухуда.
Фондунин пресс-къуллугъди мадни хабар гузвайвал, республикадин 10 агъзурдалай виниз агьалияр цIи ифтардалди (сив хуьдай суьрсет) таъминардайвал я. Идахъ галаз алакъалу яз, и кар кьилиз акъуддай ксари-волонтёрри хатасузвал таъминарунин жигьетдай лазим тир вири къайдайрал амалда. Ифтар агакьарзавайбурун сиягьрик алай вахтунда коронавирусдин азардихъ галаз женг чIугвазвай сагъламвилин ва азаррин вилик пад кьадай идарайра (ЛПУ) йикъан дежурствойра авай духтурарни кутунва.
Ифтар кIвалериз агакьарунин карда фондунин республикадин шегьерра ва районра кардик квай вири 50 филиалдини иштиракда.
Чи мухбир
