Ватанпересвилин гьиссер дагъвийрин бинеда, ивида ата-бубайрилай ава. И кар абуру Ватандин ЧIехи дяведа, ватан хаталувилик акатай маса вахтара къалурна. Забит Ризванова вичин «Весида» кхьейвал, иервал — дишегьлидиз, викIегьвал итимдиз хас я. Халис итимдиз, игитдиз вичин викIегьвиликай хабар жедайди туш, адан игитвал кьатIудайбур несилар я.
Виридаз чизва: дяве цIай-тIурфан, мусибат, каш-мекь я. Гьич са дявени къурбандар галачиз жедач. Донбассдани гьакI я. Ана рикIера пакадин йикъарин экуь къастар амай жегьилар телеф жезва, абурун диде-бубайрин, багърийрин рикIера сагъ тежедай хирер тазва.
Махсус серенжемда къалурай кьегьалвиляй СтIал Сулейманан райондин кьил Саид Темирханова и йикъара мад рагьметдиз фейи кьве игитдин дидедив ва бубадив «Жуьрэтлувиляй» орденар вахкана.
Кьасумхуьрелай тир Къазанфар Шамилович Ярагьмедова икьрардин бинедаллаз къуллугъзавай. Старший сержант Ярагьмедов штурмовой (гьужумдин) взводдин командирдин заместитель тир. Ам 2023-йисан 9-июндиз Луганскдин республикада къуллугъдин везифаяр тамамардайла игитвилелди телеф хьана. Ватанперес хцин 32 йис тир.
42 йисан яшда авай птидхуьруьнви Райфудин Сейфудинович Нуралиева, тамам тушир мобилизациядик кваз фена, махсус серенжемда вичин къуллугъдин везифаяр тамамарзавай. 2023-йисан 18-июлдиз Р. Нуралиев игитвилелди телеф хьана.
Аскервилин ва къуллугъдин везифаяр тамамардайла жуьрэтлувал, дирибашвал къалурунай Къазанфар Ярагьмедов ва Райфудин Нуралиев Россиядин Федерациядин Президентдин Указдалди «Жуьрэтлувиляй» орденриз лайихлу хьана.
Райондин кьил Саид Темирханова шабагьар Къазанфар Ярагьмедован буба Шамил Ярагьмедовав ва Райфудин Нуралиеван диде Къизпери Нуралиевадив вахкана, абуруз башсагълугъвал гана.
«Гьиниз гуьлле гайитIани, ам дидедин рикIихъ галукьзава», — кхьенай Фазу Алиевади. Дидедин рикIихъ хьиз, гуьлле бубайрин, вахаринни стхайрин, багърийрин рикIерихъни галукьзава. И карни виридаз ашкара я. Бес дявейрин гьерекатрик цIай кутазвайбурухъ веледар авачни?… Лянет хьурай миллетбазриз!
Хазран Кьасумов
