Украинадин миллетбазрикай Донбасс азад авун патал кьиле тухузвай махсус серенжемда авай са юлдашди зав шад хабар агакьарна: «Мегьарамдхуьруьн райондай тир ви ватанэгьли Маидов Акиф Мегьамедовичаз командующийди «Жуьрэтлувиляй» орден гана. Ихьтин лайихлу шабагь адаз женгинин тапшуругъар кьиле тухудайла къалурай уьтквемвиляй, дирибашвиляй ва викIегьвиляй гана».

Заз Акиф Маидовахъ галаз ­ра­хадай мумкинвални хьана. За адаз рикIин сидкьидай гьукуматдин­ шабагь тебрикна. Адаз ва адахъ галаз къуллугъзавай юлдашриз сагъ­даказ ва гъалибвал гваз чпин хизанрин патав хтун алхишна.

Акиф Маидова лагьайвал, махсус серенжемда дагъустанвийри викIегьвилелди иштиракзава. Командованиди вилик эцигзавай тапшуругъарни абуру, дагъус­танвидин лайихлувал квадар тавуна, кьилиз акъудзава.

Къейд авун лазим я хьи, Акиф Маидов заз Ленинграддин военный округда къуллугъдайла чизвайди я. Адан командирри са шумуд сеферда  викIегь, дирибаш дагъустанвидин тарифарна. Адан жавабдарвал, тапшуругъар тамамарунин алакьун чешне авачирди яз къейдна. Мадни лагьайтIа, Акифа вичин алакьунар Кеферпатан Кавказда террористриз акси серенжемар кьиле тухудайлани къалурна. Гьа вахтунда викIегьдаказ командирдин тапшуругъ кьилиз акъудай адаз «Дирибашвиляй» медаль ганай.

Сириядин арабрин республикада между­народный террористрин  дестейрихъ галаз кьиле тухвай женгерани Акиф Маидов тафаватлу хьана. Намуслувилелди вичин вилик эцигнавай везифаяр тамамарай аскердиз «Женгера та­фаватлувиляй» ва гьакI Суворован медалар гана.

Украинада военный махсус серенжемдив­ эге­чIайла, Акиф Маидова къуллугъзавай часть Донбассдиз рекье туна. Инани ада са чIавузни зайифвал къалурзавач. Вичин чандиз жезвай­ ха­талувилизни килиг тавуна, командиррин ­жуь­реба-жуьре тапшуругъар кьилиз акъудзава. Авай шабагьрал Жукован медални алава хъхьана­.

Гьелбетда, женгер хаталубур я. Маидовални залан хер хьана. Госпиталда кIвачел ахкьалтайдалай гуьгъуьниз викIегь аскердиз отпуск гана ва ам хайи хуьруьз хъфена. Мегьарамдхуьруьн райондин администрациядин кьил Фарид Агьмедова дирибаш аскердал, кIвализ фена, кьил чIугуна. Абурун арада вижевай суьгьбет кьиле фена. Гьа са вахтунда Маидоврин викIегь стхаярни рикIел хкана. Абурукай сад, майор Борис Маидов, гьукуматдин са шумуд шабагьдин иеси я. Суьгьбетдин эхирдай Фарид Агьмедова райондин администрацияди махсус серенжемда иштиракзавай кьегьал рухвайрин хизанриз яшайишдин рекьяй жуьреба-жуьре куьмекар гузвайдакай лагьана.

Низамидин Къаинбегов