Багъ-бустанда, базарда ва я туьквенда хъсан еридин, акунарни алай ичер, чуьхверар, шефтелар, пIинияр ва маса яр-емиш акурла, гьар са касдин гуьгьуьл шад жеда. Ери авай, экологиядин рекьяй михьи  емишар, майваяр менфятлуни я. Идалайни гъейри, жуьреба-жуьре рангарин, кьуд патаз атир чукIурзавай емишри шадвилин мярекатрин суфраяр гуьрчегдиз къалурзава, берекатлу ийизва. Ихьтин легьзейра зи фикирдиз гьа яр-емиш, салан майваяр битмишарзавай зегьметчи инсанар — багъманчиярни майвачияр къведа. Ихьтин зегьметчийрикай сад вичиз гьахълудаказ “багъманчийрин хуьр” лугьузвай Агъа СтIал-Къазмайрилай тир  Назлухалум  Мегьамедова  я.

Зегьметчи хизанда дидедиз хьайи Назлухалумаз зегьметдин дад, чилин къа­­­дирни фад чир хьана. Школа акьал­тIарайдалай гуьгъуьниз ада са шумуд йи­суз республикада машгьур “Ашагастальский” совхозда багъманчивилин бри­га­дада ва Жейранханум Садыкьидин лежбервилинни фермервилин майишатда рабочийвиле кIвалахна. И йисара адаз багълара агротехникадин гьар са серенжем кьиле тухунин, цилер цаз, къе­лемар гьасилунин сирерни чир хьана.

Эхиримжи 30 йисан къене Н. Мегьамедова вичин хсуси къелемлухда гьар жуьредин къелемар гьасилунал маш­гъул жезва. Тежрибалу багъманчиди арадал гъизвай ичин, чуьхвердин, пIини­дин, маш­машрин, шефтелрин, жумун, хурмадин, хатрутдин, кицикдин ва маса емишрин къелемриз гьар йисуз районда ва адалай къецени гзаф муьштерияр ава. Адаз къелемар заказ гузвай лежбервилинни фермервилин майишатар, агропромышленный чIехи карханаярни ава.

Н. Мегьамедовади 15 сотыхдин къелемлухда гьар йисуз, емишрин цилер  цаз, 3000-4000 къелем арадал гъизва.

— 2022-йисан зулахъайни за жуьреба-жуьре емишрин цилер къелемлухда накь­ва­дик кутунва, — лугьузва Н.Мегьа­ме­­дова­ди. — Кьве йисалай, яни 2024-йисан зулу­хъай­ абурукай муьштерийриз ма­са гудай къелемар жеда. Хатрутдин ва хурма­дин чIу­ру къелемриз тIур ав­густ­дин вацра гузва.­

Н. Мегьамедова гьакъикъатдани вичин кIвалах лап хъсандиз чидай багъманчи я. Багъларихъ гелкъуьнин, къеле­мар гьасилунин сирер ада масабурузни чирзава. Тежриба къачуз, адан патав ин­санар неинки СтIал Сулейманан, гьакI­­ни Дербент, Мегьарамдхуьруьн, Къаякент, Кьурагь ва маса районрайни къвезва. Ада, къелемар гьасилиз, абурук тIур кутаз чирай са шумуд касдикай районда машгьур багъманчияр хьанва.

Н.Мегьамедовади чаз лагьайвал, рикI алай кIвалахди адаз руьгьдин таъминвал, гьасилай къелемрикай багълар хьуни рикIиз шадвал гузва.

Ваз къуватар хьурай, багъманчи Наз­лухалум!

Хазран  Кьасумов