15-августдиз Сергей Меликова Ростехнадзордин (Федеральная служба по экологическому, технологическому и атомному надзору) кьилевайбурухъ галаз гуьруьш кьиле тухвана.
Ростехнадзордин регьбер Александр Трембицкийди, Махачкъалада арадал атай бедбахтвилин дуьшуьшдихъ галаз алакъалу яз, вири дагъустанвийриз башсагълугъвал гана. Ада къейд авурвал, и мусибатдин себебар тайинарун патал махсус комиссия арадал гъанва, адан кьиле Кавказда авай Управленидин регьбер Алан Цалиев тайинарнава. Комиссиядик Урусатдин жуьреба-жуьре регионрай тир пешекарар акатнава. Абуру герек тир вири экспертизаяр кьиле тухуда.
«РФ-дин Генеральный прокурордин тапшуругъдалди республикадин мулкарал алай вири АЗС-ар (абурун кьадар 600-лай алатнава, абурукай 122 – региондин меркезда ава) ахтармишдайвал я. Сифте нубатда – Махачкъалада авайбур. Лазим хьайитIа, Ростехнадзордин кьилин аппаратдин пешекарарни желбда», — лагьана А.Трембицкийди.
Сергей Меликова къейд авурвал, вири месэлаяр виликамаз тайинарнавай пландин бинедаллаз ва тамамдиз гьялна кIанда.
«…Силисдин органри гьихьтин нетижаяр кьуртIани, арадал атанвай мусибатдин дуьшуьшдин кьилин себебрикай сад объектрин иесийрин къайгъусузвал я. Кьвед лагьайди, — гьукумдин органри нагьакьан крариз рехъ гун. Аквадай гьаларай, абуру къанунсуздаказ акьалтIай хаталувал авай объектар эцигдай ихтиярар ганва. Пуд лагьайди, – органрин патай чарасуз яз хьун герек тир гуьзчивал тахьун. Гуьзчивал тухузвай къуллугърин векилри, карчияр ахтармишдайла, абуру кIвалах тухузвай объектар эцигунихъ галаз алакъалу документар ахтармишун чарасуз я. Мисал яз, вичел ихтибарнавай участокда датIана гуьзчивал тухузвай полициядин участковыйди.
Исятда чна «Газпромдихъ» галаз санал рекьерин къерехра эцигнавай объектрин, инфраструктурадин къурулушда къайда твазва. АЗС-дин патав датIана сваркадихъ галаз алакъалу ва я маса кIвалахар кьиле тухузвай технический рекьяй къуллугъзавай станция (автосервис) хьуни къанун-къайдадал амал тавуникай хабар гузва», — лагьана Сергей Меликова.
Къейд ийин хьи, Силисдин органри кьиле тухванвай ахтармишунрин сифтегьан нетижайралди, автосервисда кIвалахзавай чIавуз са куь ятIани цIай кьуна, гуьгъуьнлай — автосервисдин патав гвай чкадини. Ана фад цIай акатдай миянардай шейэр (бязи чешмейрин делилралди, – селитра) аваз хьана. Ада цIай кьунин нетижада патав гвай АЗС хъиткьинна.
Чи мухбир
